Kombetarja

Lojë, rezultat dhe qartësi. Cilat janë 8 siguritë e Rejas!

Shqipëria nuk është më konfuze si në kohën e Panuçit. Reja i ka vënë pikat mbi “i”, i ka idetë të qartë dhe zgjedhjet e tij janë të sakta. Kombëtarja shqiptare tani ofron siguri, ekipi është i konsoliduar dhe i bashkuar, prodhon lojë dhe raste për shënim, por edhe rezultat. Mëkat që na iku ajo pikë e merituar në Turqi. Trajneri Edi Reja ka punuar njëkohësisht në tri linja, lojë-rezultat-perspektivë, dhe ia ka dalë të bindë drejtuesit e FSHF-së për vazhdimin e bashkëpunimit, por edhe tifozët kuqezi. Po revolucionarizon Kombëtaren me lojëra të mira dhe fitore të thella. Në ekipin e tij janë 8 lojtarët e sigurt.

Edi Reja, trajneri i Kombëtares. Gazeta Si, 15 tetor 2019

“Ishte një ndeshje e vështirë, ku duhet përqendrim maksimal, edhe pse kundërshtari ishte modest. Kur rezultati shkoi 0-3, e menaxhuam mirë lojën. Ishte një paraqitje e mirë si skuadër”, – ka theksuar pas fitores në Moldavi trajneri i Shqipërisë, Edi Reja, duke mos veçuar individë. Sigurisht, është mjaft i kënaqur për lojën dhe rezultatin. Mekanizimi që italiani ka ndërtuar po funksionon më së miri. Kuqezinjtë po shfaqen një skuadër kompakte, që të jep besim. Dora e trajnerit Reja është e dukshme. Lëvizjet e tij kanë rezultuar të goditura. Që pas ndeshjes me Islandën, ku po ashtu Shqipëria ka shënuar 4 gola, trajneri ka siguritë e tij në çdo repart sa i takon formacionit dhe i duhet të ndryshojë vetëm pak gjëra, në varësi të kundërshtarit.

Reja e ka ndarë mendjen për portën, duke ia besuar kuadratin Strakoshës, pavarësisht asaj gafe fatale në Turqi, që u hoqi kuqezinjve një pikë plotësisht të merituar. Nuk ka më dy portierë njësoj, por Strakosha portier i parë dhe Berisha i dytë, ndërsa i tretë tani vlerësohet Selmani që ka parakaluar Hoxhën e Partizanit. Siguritë e trajnerit Reja vazhdojnë në mbrojtje me dy nga tre lojtarët e këtij reparti. Ismajli dhe Gjimshiti janë të palëvizshëm. Ofrojnë garanci dhe janë ende në rritje si lojtarë. Për vendin e mbrojtësit të tretë janë Mavraj, Dermaku dhe Kumbulla kandidatë kryesorë, me këtë të fundit që debutoi në Moldavi dhe që gradualisht do t‘u bashkohet Gjimshitit dhe Ismajlit.

Keidi Bare, mesfushori i palodhur i Kombëtares. Gazeta Si, 15 tetor 2019

Në mesfushë Reja ka ndryshuar gjithçka, jo vetëm se aplikon skemën me 5 lojtarë në këtë repart. Ai ka ndryshuar qendrën, duke ua besuar “çelësat” e lojës Gjasulës dhe Bares, të cilët janë siguria kryesore e kuqezinjve. Janë të dy titullarë fiks, për të cilët trajneri italian ka guxuar dhe koha i ka dhënë të drejtë. Janë ata të dy “motorët” e Kombëtares, mjaft të disiplinuar taktikisht, agresivë dhe të saktë në pasime. Memushaj dhe Abrashi janë alternuar për mesfushorin e tretë të qendrës, ndërsa në krahë titullarë konsiderohen Hysaj dhe Lenjani. Një mesfushë që ka bërë të mos ndihet aspak mungesa e Bashës së tërhequr nga Kombëtarja dhe Xhakës që është lënë jashtë liste nga trajneri Reja. Befasuese ka qenë vendosja e Veselit në mesfushë, ku mbrojtësi ka bërë një paraqitje shumë të mirë në të dyja ndeshjet e fundit. E ka bërë më së miri Hysajn dhe Reja e ka të qartë se çfarë mund të bëjë ky lojtar. Nuk është aspak çudi që me rikthimin e Hysajt ta shohim në të majtë, të bëjë Lenjanin. Mbështetja që i ka dhënë Reja duket se e ka rilindur lojtarin e Empolit.

Cikalleshi dhe Manaj, dyshja titullare e sulmit kuqezi. Gazeta Si, 15 tetor 2019

Edhe në sulm trajneri ka siguri të plotë. Cikalleshi-Manaj është një dyshe që funksionon. Ata e ndihmojnë shumë skuadrën, duke bërë presing te mbrojtja kundërshtare, kombinojnë mirë me njëri-tjetrin, krijojnë raste dhe mbi të gjitha shënojnë. Jo më kot trajneri Reja nuk i ka lëvizur më që nga ndeshja me Islandën. Kështu, në total trajneri italian është shumë i qartë për potencialin që skuadra që drejton, e di shumë mirë kush duhet të luajë dhe si duhet të luajë. “Orkestra” e dirigjuar prej tij bën “muzikë” të mirë për tifozët e Kombëtares dhe nuk ka më dyshim se është trajneri i duhur për Shqipërinë. Presidenti i FSHF-së, Armand Duka, ka lënë të kuptohet se bashkëpunimi do të vazhdojë. “Nuk ka shumë gjëra për të diskutuar”, – ka thënë ai pas fitores me Moldavinë. Shqipëria e Rejës është ndër skuadrat më të mira që kemi parë.

 

Më Shumë