Ish-futbollisti i kombëtares së Bahreinit, Hakim Al-Araibi, mund të buzëqeshë pas 70 ditësh burg në Tajlandë, ku ishte arrestuar teksa ishte me pushime. Ai kishte marrë një dënim në vendin e tij, por Bahreini tashmë e ka tërhequr urdhrin e ekstradimit.
Pas 70 ditësh në arrest me burg në Tailandë, ish-futbollisti i Bahreinit, Hakim Al-Araibi, ka lënë më në fund këtë vend dhe ka fluturuar drejt Australisë. Bahreini ka tërhequr urdhrin e ekstradimit dhe kështu Al-Araibi, i cili kishte bërë xhiron e botës me fotot nga burgu dhe kishte vënë në lëvizje shumë futbollistë dhe federata futbolli, ka rifituar lirinë. Ai akuzohej nga Bahreini se kishte marrë pjesë në trazirat e “Pranverës arabe”, ndërkohë që futbollisti kishte qenë duke luajtur në atë kohë.
"Nuk ka arsye për ta mbajtur në burg”, - kanë thënë autoritet tajlandeze, sapo kanë marrë njoftimin zyrtar se nuk ka më urdhër arresti për futbollistin nga Bahreini. Al-Araibi ka marrë menjëherë avionin për të fluturuar drejt Melburnit. Në vitin 2014, Al-Araibi ishte dënuar për pjesëmarrje në lëvizjen antiqeveritare dhe teksa ishte me pushime në Tajlandë, është arrestuar. Tashmë ai ka fituar lirinë dhe i është kthyer jetës normale. Shumë futbollistë, mes tyre edhe mbrojtësi i Juventusit, Xhorxhio Kielini, kishin shprehur solidaritetin e tyre për çështjen e Al-Araibit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.