Tre gola për të thelluar diferencën me ndjekësit në krye të klasifikimit dhe rekord historik për Lionel Mesin. Nuk kishte si të shkonte më mirë për katalanasit ndeshja me Eibarin, që u mbyll me rezultatin 3-0. Barcelona ka lënë pas humbjen në Kupën e Mbretit me Levanten dhe ka rinisur vrapin në kampionat, duke regjistruar fitoren e gjashtë radhazi, me të veçantën e 18 golave të shënuar dhe vetëm 1 goli të pësuar në këto ndeshje.
Në “Camp Nou” vendosën dygolëshi i Luis Suaresit dhe goli i atij që nuk mund të mungonte kurrsesi në këtë ndeshje, Lionel Mesit. Sulmuesi argjentinas ka firmosur golin numër 400 në La Liga, duke u bërë i pari futbollist që kap këtë shifër. “Pleshti” tashmë ka edhe një rekord të ri në Spanjë, edhe pse për “Marca”-n, që njihet si një gazetë pranë Realit të Madridit, golat e Mesit mbeten 399.
Suarez zhbllokoi rezultatin në pjesën e parë. Për më shumë se 50 minuta, skuadra baske e Eibarit mbylli çdo hapësirë për yllin argjentinas, të cilit i ka mjaftuar një rast për të vënë firmën e tij. E majta e tij nuk i la asnjë shans portierit Riesgo: Mesi vendos rekordin personal dhe Eibar ngre “flamurin e bardhë”. Më pas Suarez trefishoi rezultatin dhe Barcelona nuk shpenzoi më energji, por administroi me qetësi lojën deri në fund.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.