Kohë ndryshimesh te Milani. Braziliani Leonardo, një nga drejtuesit kryesorë të klubit kuqezi, është pranë largimit dhe ai që mund ta zëvendësojë është Igli Tare, drejtori sportiv i Lacios. Lajmi bëhet i ditur nga portali italian “Calciomercato.com”, që shpjegon se Tare është ndër kandidatët kryesorë për të zënë vendin e Leonardos, nëse ky i fundit i jep lamtumirën Milanit.
Kohët e fundit është vënë në dyshim posti i drejtorit të sektorit tekniko-sportiv të Milanit, Leonardos, i cili nuk ka raporte të mira me administratorin e ri, Ivan Gazidis. Së fundi Leonardo ka marrë një tjetër “Jo” nga Gazidis, këtë herë për futbollistin brazilian Everton. Leonardo duket se është personi që do të paguajë për sezonin e dobët të Milanit, aq më tepër nëse kuqezinjtë mbeten jashtë Championsit dhe gjasat janë të mëdha të ndodhë kështu. Drejtuesi brazilian mund të jetë një nga “kokat e prera” të “Elliott”. Dhe si zëvendësuesi më i mirë shihet drejtori sportiv i Lacios, Igli Tare, emri i të cilit është lakuar edhe më parë në klubin kuqezi.
Në fakt, raporti i Tares me Lotiton ka qenë mjaft i mirë për vite me radhë, por këtë sezon, që nuk ka qenë pozitiv për Lacion, mes tyre ka pasur ndonjë fërkim. Shumë gjëra mund të vendosen nga finalja e Kupës së Italisë, që mund të ndryshojë gjithçka për Lacion. Por, në rast se Kupën e Italisë e fiton Atalanta, krisja mes drejtuesit shqiptar të Lacios dhe presidentit Lotito mund të thellohet dhe në këtë rast mund të përfitojë Milani.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.