.png)
Kandidati i Lëvizjes Vetëvendosje, Shpejtim Bulliqi është shpallur fitues i zgjedhjeve në Komunën e Besianës (Podujevë).
Sipas shifrave të publikuara nga Komisioni Qendror i Zgjedhjeve, Vetëvendosje ka korrur një sukses dërrmues në këtë zonë që njihej si bastion i Lidhjes Demokratike të Kosovës, e cila e ka drejtuar këtë komunë për 20 vite me radhë.
Vetëvendosje dhe kandidati i saj kanë marrë rreth 52 për qind të votave, ndjekur me rreth 36 për qind të tyre nga LDK dhe vetëm 12.5 për qind nga Partia Demokratike e Kosovës.
Zgjedhjet në Komunën e Besianës ishin të parakohshme pas dorëheqjes së përfaqësuesit të LDK-së, Agim Veliu, që u emërua ministër i Brendshëm në qeverinë Kurti si pjesë e marrëveshjes Kurti-Mustafa.
Fill pas shpalljes së rezultatit, zëra brenda LDK-së kanë kërkuar dorëheqjen e Kryeministrit Avdullah Hoti dhe dërgimin e vendit në zgjedhje të reja.
Mbajtja e procesit zgjedhor u shty për disa muaj për shkak të pandemisë së Covid.
Ndërkohë, në Komunën e Mitrovicës së Veriut fitues u shpall kandidati i Listës Serbe, Milan Radojeviç me rreth 90 për qind të votave, subjekti i dytë u rendit Vetëvendosje, ndjekur më pas nga PDK.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
