.png)
Gazeta Si - Barazim 2-2 mes Juventusit dhe Lacios, në ndeshjen ku Kielini dhe Dibala janë ndarë me ekipin torinez. Bardhezinjtë në Champions, kurse Lacio shkon në Ligën e Europës.
Dushan Vlahoviç dhe Alvaro Morata shënuan fillimisht për Juventusin, miqtë barazuan me autogolin e Aleks Sandros dhe golin e Milinkoviç-Saviç në kohën shtesë.
Paqe në ‘extremis’ në ‘Stadium’ mes Juventusit dhe Lacios në javën e 37-të të Serisë A. Skuadra e Alegrit dhe ajo e Sarrit barazuan 2-2 dhe Lacio siguron kështu matematikisht pjesëmarrjen në Ligën e Europës.
Në Torino rezultati u zhbllokua pas 10 minutash nga Vlahoviç, i cili shënoi në portën e Strakoshës. Dyfishimi erdhi në minutën e 36-të nga Morata. Në pjesën e dytë Lacio reagoi dhe baraspeshoi gjithçka me një autogol të Aleks Sandros dhe një gol të Milinkoviç-Saviç në minutën e 5-të shtesë.
‘Standing ovation’ në stadium për dy lojtarët që sot i dhanë lamtumirën Juventusit, Kielini dhe Dibala. Ishte ndeshja e tyre e fundit me fanellën bardhezi dhe gjithë stadium i nderoi me duartrokitje të gjata.
Kielini e nisi ndeshjen titullar dhe pas çerek ore lojë i la vendin De Ligt. Mbrojtësi i vendosi shiritin e kapitenit Diabalës dhe doli nga fusha mes përqafimeve të shokëve. Ishte ai ylli i mbrëmjes për Juventusin.
Mes emocionesh të mëdha la fushën 12 minuta para fundit edhe Paulo Dibala. Një tjetër lamtumirë nga bardhezinjtë. Prej kohësh sulmuesi argjentinas e kishte marrë vendimin për t’u larguar nga Juventusi në fund të sezonit.
Nga lojtarët e Kombëtares shqiptare sot luajti vetëm Tomas Strakosha në radhët e Lacios. Portieri kuqezi pritet të largohet nga Lacio në verë, ndërsa mbrojtësi shkodran, Elseid Hysaj, nuk luajti asnjë minutë në këtë ndeshje.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
