.png)
Gazeta Si - Gjykata e Apelit të Posaçëm, vendosi të rrëzojë vendimin e dënimit me 12 vjet heqje lirie për Astrit Balliun alias Avdyli, i cili një vit më parë u dënua për akuzën e “Trafikimit të narkotikëve” kryer në formën e “Grupit të strukturuar kriminal”.
Sipas Apelit, Avdyli, së bashku me të pandehurin tjetër Fatos Llatfiu, duhet të kthehen për rigjykim në shkallën e parë me një tjetër trup gjykues, shkruan 'Ora news'. Aktualisht Astrit Avdyli dhe Fatos Llatfiu, ndodhen në masën e sigurisë “arrest në shtëpie”.
Ndërkohë, Gjykata e Apelit, prishi vendimin për të akuzuarin Jasin Avdyli (Kala), të cili i shtoi dënimin nga 7 vite në 12 vite burg. Ndërsa për të pandehurin tjetër Denis Llaftiu nga person i pafajshëm, i ndryshohet vendimi në 10 vite burg.
Të vetmet vendime që Apeli i GJKKO la në fuqi, ishte dënimi me nga 15 vite burg të Xhemal Shalës e Iskënder Salës. Këta persona akuzohen nga SPAK si individët që kishin ndërtuar laboratorin e heroinës në Has, të cilën e trafikonin nga Turqia në drejtim të Italisë.
Laboratori u zbulua në sajë të operacionit “Vol-Vo 4”, në tetor 2018, ku u sekuestrua një sasi e konsiderueshme heroine.
Personat vepronin si një grup i strukturuar kriminal dhe ishin pjesë e dosjes së famshme me "339", e cila u regjistrua nga ish-Prokuroria e Krimeve të Rënda dhe më pas u transferua në SPAK.
Ndërkohë në 1 shkurt 2021, Gjykata e Posaçme, dënoi me 125 vite burg 17 personat e tjerë të përfshirë në laboratorin e heroinës në fshatin Brenog të Hasit.
Admir Hoxha, i cilësuar kreu i grupit kriminal që merrej me prodhimin dhe trafikun e heroinës, u dënua me 12 vite burg në mungesë.
Ndërsa Altin Avdyli që njihet si kreu i grupit të Avdylajve në Shijak, është dënuar 6.8 vite burg. Gjevi Ndoka, vëllai i ish-deputetit socialist, Arben Ndoka, është dënuar me 8.8 vite burg.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
