.png)
Kryetari i komanduar i Partisë Demokratike, Enkelejd Alibeaj, tha se do të jenë deputetët e grupit parlamentar ata që do të negociojnë me përfaqësues të Foltores për të bërë të mundur bashkimin e partisë.
“Nëse lexoni me kujdes qëndrimin, aty saktësohet se i gjithë Grupi Parlamentar shprehet i gatshëm të negociojë me kolegët e pezulluar, dhe kështu do të jetë: i gjithë Grupi Parlamentar do të jetë praktikisht pjesëmarrës në negociatë dhe sigurisht, vendimmarrës për gjetjen e një zgjidhje të pranueshme që synon bashkimin. Vullneti fillimisht e pastaj procesi”, tha Alibeaj.
Sipas tij, ajo që është e rëndësishme për momentin është gjetja e një mekanizmi konsensual për bashkimin e partisë, në konsultim edhe me institucionet e tjera të partisë.
“Sa i përket procesit, vijues, është çështje që do të vendoset hap pas hapi. Ajo që dimë me siguri në këtë moment ka të bëjë me parimet që duhet të përshkojnë këtë proces, bëhet fjalë për ngritjen e një mekanizmi konsensual, luajal ndaj vlerave themelore të Partisë Demokratike, sigurisht në konsultim edhe me institucionet e tjera të partisë. Qëndrimi tashmë është publik, besoj falë medias i njohur nga çdokush. Është e kuptueshme që çdo proces, sikundër edhe ky, ka nevojë për kohën e duhur në mënyrë që secili prej atyre që iu adresohet, të formulojë qëndrimet respektive”, tha Alibeaj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
