.png)
Kryeministri i Kosovës, Albin Kurti, në konferencë për media pas samtit “Ballkani Perëndimor takon BE-në” të mbajtur në Shkup, ka thënë se ai sa herë që i vjen mundësia kërkon që të ndahet procesi i anëtarësimit të Kosovës në BE nga procesi i normalizimit të marrëdhënieve me Serbinë.
“… ne jemi shtet normal e demokratik që duhet t’i normalizojë marrëdhëniet me një shtet që nuk është demokratik dhe që sipas organizatave më prestigjioze ndërkombëtare, vlerësohet regjim hibrid. Nuk duhet të penalizohemi. Më 15 dhjetor të vitit 2022 kemi dorëzuar aplikimin zyrtar për anëtarësim në BE. Presim nga Komisioni Evropian pyetësorin me mijëra pyetje e do të jemi të durueshëm e të vëmendshëm t’u përgjigjemi të gjithave. Por, nuk është e drejtë që një shtet ku vullneti për t’u anëtarësuar në BE është 94 për qind të mbetet peng i çështjes së normalizimit me një shtet ku vullneti i anëtarësimit mbetet 35 për qind dhe që mbetet prapa nesh sa i përket sundimit të ligjit, respektimit të të drejtave të njeriut dhe të pakicave. E kuptoj se BE-ja në thelb e ka fqinjësinë e mirë, por duhet kuptuar se nuk është kollaj të normalizohen marrëdhëniet me një shtet që nuk e ka prioritet as Perëndimin as demokracinë”, tha Kurti.
Ai u shpreh se aktualisht dialogu po zhvillohet në nivel të kryenegociatorëve dhe se nuk ka diçka të re sa i përket ndonjë takimi të mundshëm të nivelit të lartë. Kurti ndërkohë ka thënë se Kosova s’ka vendosur ndonjë masë tregtare ndaj Serbisë, por thjesht ka masa sigurie dhe se ato do të mbeten derisa grupi terrorist prapa sulmeve në Banjskë të 24 shtatorit, të mbetet i lirë në Serbi.
“Në vitin 2023 që sapo lamë pas, kemi pasur tri sekuestrime masive të armatimit e municionit në veri të Kosovës, më 23 qershor, 5 shtator e 24 shtator kur edhe e vranë rreshterin tonë policor, heroin e kombit, Afrim Bunjaku. Gjithë armatimi ishte prodhuar në Serbi e erdhi nga Serbia. Kur kësaj ia shtojmë edhe faktin që në masë të madhe pjesëtarët e atij grupi paramilitar janë të lirë në Serbi me në krye Milan Radoiçiqit; atëherë masat e sigurisë janë të domosdoshme”, ka thënë Kurti.
Ndërkohë i pyetur për nismën “Ballkani i Hapur”, Kurti ka thënë para mediave se kjo nismë nuk është mjaftueshëm evropiane dhe se plani për zgjerimin e BE-së “është mjaftueshëm i hapur”. “Ballkani i Hapur nuk ka strategji zhvillimore, nuk i ka rregullat e Bashkimit Evropian dhe as transparencën”, ka shtuar Kurti. /EO
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
