.png)
Gazeta Si – Seanca për konstituimin e Kuvendit të Kosovës u ndërpre këtë të enjte, pasi kryeministri në detyrë, Albin Kurti nuk propozoi një emër si kandidat për kryetar Kuvendi.
Ai tha se i duhet kohë që të zhvillojnë bisedime me partitë opozitare për arritjen e një marrëveshje për presidentin.
Në sallën e Kuvendit ishin të pranishëm 119 deputetë të cilët u betuan ndërsa seancën e parë e drejtoi, Avni Dehari, deputeti I LVV që rezulton edhe më i vjetri në moshë.
“Ne duam bisedime edhe me PDK-në, edhe me Aleancën, edhe pse refuzimi i tyre është i qartë. Duam të ecim përpara bashkërisht, por na duhet dakordimi sa më i gjerë për presidentin unifikues, ashtu siç e kërkon kushtetutshmëria për të cilën u betuam sot”, deklaroi Kurti në Kuvend.
Kurti shtoi se konstituimi i institucioneve nuk duhet të përfundojë me shpërndarjen e Kuvendit dhe mbajtjen e zgjedhjeve të reja.
“Konstituimi kësaj radhe nuk mund të jetë sërish drejt një shpërndarjeje të Kuvendit dhe përsëri zgjedhje të parakohshme e të paarsyeshme, të dëmshme për ekonominë. Andaj, i nderuari kryesues Avni Dehari, kërkojmë kohë shtesë që t’u japim shans marrëveshjeve për president apo presidente të re”, ka thënë Kurti.
Dy ditë më parë Albin Kurti takoi kreun e LDK Lumir Abdixhiku, partia e të cilit ka shprehur ambicien për të zgjedhur një figurë të propozuar prej saj, si kryetarin e ri të shtetit.
Kurti pas takimit ka thënë se LVV do të votojë një figurë që nuk përfshihet në politikën e ditës, ndërsa në pranverë nuk mbështeti një mandat të dytë për Vjosa Osmanin që tashmë është zgjedhur deputete.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje