.png)
Gazeta Si – Pas humbjes me Laçin në shtëpi u duk gati fakt i kryer shkarkimi i trajnerit të Partizanit, Xhovani Kolela. Të kuqtë kanë shumë javë që nuk fitojnë, kanë mbetur 6 pikë pas Tiranës kryesuese, një diferencë e konsiderueshme, ndaj dhe pritej ndryshimi në stol.
Por klubi kryeqytetas ka vendosur që t’i japë edhe një shans trajnerit italian. Dhe ky shans është ndeshja e radhës me Bylisin në kampionat. Nëse fiton në Ballsh, Kolela do të qëndrojë në krye të Partizanit, në të kundërt largimi është i sigurt.
Në fakt, duhet theksuar se kriza e Partizanit ka të bëjë edhe me shitjen e disa titullarëve me shumë peshë në skuadër gjatë merkatos së dimrit. Nga ky ekip u larguan mbrojtësi Eneo Bitri, sulmuesi Xhuljano Skuka dhe mesfushori Arinaldo Rrapaj, duke prishur kështu ekuilibrat në formacion.
Klubi i kuq e ka marrë parasysh këtë fakt dhe për këtë ka vendosur që Kolela meriton edhe një shans, pasi nuk është vetëm faji i tij që Partizani nuk po fiton. Pas merkatos së dimrit, skuadra ka humbur shumë në cilësi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
