.png)
Gazeta Si - Danezi Kristian Eriksen duket se vërtet ka rilindur. Futbollisti që tronditi botën, pas atakut në zemër që pësoi në Europianin e fundit, është kthyer në nivelin e mëparshëm.
Mesfushori i njohur tani është objektiv kryesor i Mançester Junajtid. Trajneri i ri, holandezi Erik ten Hag, e kërkon me çdo kusht ta ketë në skuadër për sezonin e ri.
Kristian Eriksen, 30 vjeç, luajti me Brentfordin muajt e fundit dhe bëri një paraqitje të mirë. Ai kthye edhe në kombëtaren e Danimarkës, ku gjithashtu tregoi një nivel të kënaqshëm. Paraqitje që kanë bindur Mançesterin për ta passur në skuadër.
Danezi e njeh mjaft mirë Premier Ligën, ku për shumë vite ka mbajtur fanellën e Totenhemit. Më pas kaloi tek Interi, ku u shpall kampion. Por në Itali nuk mund të luante pas atij problemi shëndetësor për shkak të rregullave.
Mesfushori ndërpreu kontratën me Interin dhe pastaj, pasi u rikuperua fizikisht, nënshkroi për Brentfordin. Tani Kristian Eriksen mund të veshë një tjetër fanellë të rëndë, siç është ajo e “Djajve të kuq”.
Ndoshta edhe vetë futbollisti danez nuk e kishte besuar se do të vinte ky moment. Ai rrezikoi seriozisht jetën, por fati ishte me të. Eriksen ka rilindur, ka ende shumë për t’i dhënë futbollit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
