Pas ngjarjes tragjike në Fier, një krim në familje ka ndodhur mbrëmjen e të shtunës në Divjakë, Lushnjë. 58-vjeçari Hekuran Rrasa, banues në fshatin Babunjë, ka vrarë gruan Fëllënxë Rrasa, 45-vjeçe me armë gjahu dhe më pas në kushte të rënda psikologjike, ka kthyer armën nga vetja duke i dhënë fund jetës.
Ka qenë djali i çiftit, ai i cili ka dëgjuar të shtënat e armës së gjahut. Kur ka hyrë në banesë, ai ka konstatuar të vdekur të dy prindërit. I tronditur, djali i çiftit ka njoftuar policinë, që ka mbërritur në vendin e ngjarjes, në fshatin Babunjë.
Krimi ka ndodhur në banesën e çiftit dhe sipas informacioneve paraprake, dyshohet pas një sherri në familje. Në vendngjarje është gjetur dhe sekuestruar në cilësinë e provës materiale arma e gjahut.
Pak ditë më parë një ngjarje e tillë u regjistrua edhe në Zhupan të Fierit, ku 23-vjeçarja Sabrina Bengaj u vra nga ish-burri i saj, Elton Metaj, duke lënë pas një fëmijë të vogël.
Rasti i Sabrinës, ishte një kronikë e paralajmëruar, pasi nëse drejtësia do të kishte funksionuar siç duhej sot ajo do të ishte gjallë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.