.png)
SHBA-ja po mirëpret dhjetëra mijëra afganë të nxjerrë nga Kabuli, por ka bërë pak informata publike për një grup të vogël që mbetet jashtë shtetit.
Associated Press shkruan të shtunën se dhjetëra afganë për të cilët gjatë verifikimit janë ngritur dyshime në aspektin e sigurisë, janë dërguar në një bazë amerikane në shtetin ballkanik të Kosovës.
Sipas AP-së, avokatët e të Drejtave të Njeriut kanë ngritur shqetësimet rreth afganëve të dërguar në Kampin e Bondsteelit në Kosovë, në gjashtë muajt e fundit, duke cituar mungesën e transparencës në lidhje me statusin e tyre, arsyet për t'i mbajtur ata dhe pyetjen se çfarë mund të bëhet me këdo që nuk mund të shkojë në SHBA.
“Padyshim se jemi të shqetësuar”, ka thënë Jelena Sesar, hulumtuese në Amnesty International e specializuar për Ballkanin.
“Çka ndodh me të vërtetë me këta njerëz, sidomos me ata që nuk e kalojnë verifikimin e sigurisë? A do të arrestohen? A do të kenë qasje në ndihmë juridike? Dhe cili është plani për ta? A ka ndonjë rrezik për ta që të kthehen në Afganistan?”, ka thënë Sesar.
Administrata e Bidenit ka thënë se është ende herët që t’i përgjigjet këtyre pyetjeve, të paktën publikisht, pasi ajo punon nën ethe për të rivendosur afganët që u evakuuan, pas pushtimit të Afganistanit nga Talibanët në gusht.
Mungesa e informacionit publik po i sfidon ata që ndjekin nga afër fatin e refugjatëve.
“Nuk ka mjaftueshëm transparencë në kuptimin e asaj se si funksionin regjimi i kontrollit të sigurisë”, ka thënë Sunil Varghese, drejtor i politikave në Projektin Ndërkombëtar të Ndihmës për Refugjatë.
“Ne nuk e dimë pse njerëzit dërgohen në Kosovë për kontrolle shtesë, cili është ky kontroll shtesë, sa kohë do të zgjasë”, është shprehur ai.
AP-ja shkruan se më shumë se 66,000 afganë kanë arritur në SHBA që nga 17 gushti i këtij viti, duke iu nënshtruar asaj që Qeveria e portretizon si një proces rigoroz verifikimi të sigurisë, për të shqyrtuar kërcënimet e sigurisë kombëtare nga mesi i një popullate që përfshin njerëz që punonin si përkthyes për ushtrinë amerikane.
Prej tyre, rreth 55,000 ndodhen në bazat ushtarake amerikane në të gjithë vendin, ku ata përfundojnë përpunimin e imigracionit, vlerësimet mjekësore dhe karantinimin përpara se të vendosen në Shtetet e Bashkuara. Ka ende 5,000 njerëz nga evakuimi në pikat e tranzitit në Lindjen e Mesme dhe Evropë, sipas Departamentit të Sigurisë Kombëtare, i cili po menaxhon përpjekjen e njohur si Operacioni i Mirëseardhjes për Aleatët.
Ndërkohë, në shkrimin e AP-së thuhet se numri i saktë i afganëve në Kampin Bondsteel në Kosovë, një komb i vogël në Evropën Juglindore që u pavarësua me mbështetjen e SHBA-së në vitin 2008, luhatet kur njerëz të rinj mbërrijnë dhe të tjerët largohen kur zgjidhen çështjet e sigurisë, si dokumentet e munguara.
Qeveria e Kosovës, një aleat i ngushtë i SHBA-së, ka pranuar që refugjatët të qëndrojnë në territorin e saj për një vit. Kosova mban gjithashtu një grup të veçantë në zonën ngjitur me Bondsteel të njohur si Kampi Bechtel, ku afganët që kanë punuar për vendet e NATO-s gjatë luftës po qëndrojnë përkohësisht derisa të vendosen në Evropë.
Për disa javë, janë evakuuar rreth 30 afganë, së bashku me rreth 170 anëtarë të familjes, në kampin Bondsteel për shkak të flamujve të kuq, sipas një zyrtari amerikan, i cili ka folur në kushte anonimiteti për të diskutuar mbi informacionet që nuk u publikuan.
Këta afganë sipas tij, janë në një lloj harrese sepse nuk janë të ndaluar, por nuk janë domosdoshmërisht të lirë të largohen.
Ata dolën vullnetarë për t'u evakuuar nga Afganistani, por u është dhënë shenjë me flamur në një nga pikat e tranzitit në Evropë ose Lindjen e Mesme duke u thënë se duhej të shkonin në Kosovë. Disa zgjodhën të merrnin familjet e tyre me vete, ndërsa autoritetet punojnë me analistë dhe ekspertë të tjerë nga FBI, DHS dhe agjenci të tjera për të zgjidhur pyetjet në lidhje me identitetin e tyre, ka thënë një zyrtar i lartë i administratës.
Ata janë të lirë të lëvizin rreth bazës por nuk mund të largohen sipas kushteve të vendosura nga Qeveria e Kosovës. (KOHA)
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
