Ish-deputeti i PD-së, Tritan Shehu propozon aplikimin e një metode të re testimi për koronarivusin e ri Covid-19. Sipas tij, një gjë e tillë është tërësisht e mundur, madje duke ulur kostot për kryerjen e analizave, në të gjithë vendin, duke shmangur kështu edhe faktin që barrën ta mbajë Tirana e vetme.
"Kolege, menaxherë të tyre, ju mund të jeni “pionierët” e depistimit horizontal; për këtë ju mund të bëheni iniciatorët e futjes së metodave të tjera të diagnostikimit të thjeshta edhe jashtë “tamponeve”, të shpejta, të lira, që mund t’i realizoni në të gjithë territorin, me më pak përpjekje e investim fillestar. Në radhë të parë e kam fjalën per metodat imunokromatografike, për të cilat sot po flitet shumë. Mjaft vende po i aplikojnë masivisht me sukses e kosto shumë të ulët, të tjerë po i studiojnë me shpejtësi, edhe për të përcaktuar imunizimin e popullsisë më tej", shprehet Shehu.
Sipas tij, edhe kjo metodë nuk mund të realizojë objektivat e një kërkimi horizontal, nqs përsëri nëse ”tamponi” do të ngelë monopol vetëm i Tiranës.
"Suksesi strategjik i saj apo cilësdo metode tjetër të nesërme, kërkon involvimin e të gjithë juve në të gjithë Shqipërinë pa pritur ”fermane zyrtare”. Vetëm kështu do të detyrohet shteti “të zgjohet”, t'ju ndjekë dhe detyrimisht t'ju rimbursojë", thekson ish-deputeti PD-së, Shehu i cili me profesionin është mjek.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.