.png)
Nga Gazeta ‘Si’- Tregu i sigurimeve në Shqipëri vijoi të rritet edhe gjatë pesë muajve të parë të vitit 2026, i mbështetur nga shtimi i kontratave dhe zgjerimi i primeve të shkruara. Megjithatë, krahas rritjes së aktivitetit, kompanitë e sigurimeve paguan ndjeshëm më shumë dëme, kryesisht për pronat e dëmtuara nga zjarret dhe fatkeqësitë natyrore.
Sipas të dhënave të Autoritetit të Mbikëqyrjes Financiare (AMF), në pesë muajt e parë të vitit primet e shkruara bruto u rritën me 4.9%, duke arritur në 10.6 miliardë lekë, ndërsa numri i kontratave u zgjerua me 4.92%.
Sigurimet e Jo-Jetës vijojnë të dominojnë tregun, me mbi 90% të totalit të primeve. Brenda këtij segmenti, sigurimet e detyrueshme motorike mbeten produkti kryesor, duke zënë rreth 66% të tregut. Megjithatë, primi mesatar i policës MTPL është ulur me 2.12%, si rezultat i zbatimit të sistemit Bonus-Malus, raporton AMF.
Edhe segmenti i sigurimeve të Jetës shënoi rritje, ndonëse vijon të ketë një peshë modeste në treg. Primet u rritën me 5.5%, ndërsa numri i kontratave me 3.46%. Numri i dëmeve të paguara u rrit me 24.37%, kryesisht si rezultat i kontratave “Flexi Plan”, që lidhen me mbulimin e shërbimeve shëndetësore.
Në të njëjtën periudhë, AMF raporton se pagesat për dëmet u rritën me 15.86%, duke arritur në rreth 3.8 miliardë lekë. Rritja u ndikua kryesisht nga dëmshpërblimet për pronat e siguruara kundër zjarrit, forcave të natyrës dhe dëmtimeve të tjera në pronë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje