.png)
Shqipëria do të përmbyllë sot rrugëtimin thuajse perfekt të eliminatoreve për Europianin e 2024-s me ndeshjen kundër Ishujve Faroe në stadiumin “Air Albania”. Një ndeshje e konceptuar si festë për të gjithë publikun, por siç e përmendi edhe trajneri në konferencën për shtyp: “tifozët kanë ardhur për festë, por ne kemi ende punë.”
Pas kualifikimit për në finalet e Eueropianit matematikisht në ndeshjen ndaj Moldavisë më 17 nëntor, kuqezinjtë kanë për të arritur një tjetër objektiv, një objektiv luksi ky pasi do të na duhet të mbajmë vendin e parë në grup. Edhe për këtë synim na duhet sforco jo shumë të mëdha, e para se do të na mjaftojë një barazim, e dyta se luajmë ndaj skuadrës më të dobët të grupit, Ishujve Faroe, që e kemi mundur 3-1.
Gjithsesi, për këtë mbërmje të madhe për të gjithë shqiptarët, kuqezinjtë do të kenë mundësinë të festojnë edhe me një program artistik, që starton me përfundimin e pjesës së parë, ku do të jetë grupi i ansamblit që do të mbajë të ndezur atmosferën për ato 15 minuta të pushimit.
Pas ndeshjes do të jetë një program për rreth 1 orë me muzikë dhe një koreografi surprizë nga pjesa e tifozëve kuqezi. Këngëtarja e mbrëmjes do të jetë Juliana Pasha, e cila për rreth 20 minuta do të këndojë disa këngë patriotike, ndërkohë që pas grumbullimit edhe një herë të të gjithë protagonistëve në fushë, nga lojtari i parë deri tek i 23-ti dhe stafi teknik apo presidenti i FSHF-s, do ndizet një atmosferë gjigante me fishekzjarrë për të përmbyllur këtë natë magjike.
Gjithashtu, do të prezantohet edhe motoja jonë e këtij Europiani që është: “Po ku ka si ti o Shqipëria ime!”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
