Kokaina nga Panamaja me nëndetëse në Europë, përgjimi i shqiptarëve zbulon rrjetin

Gazeta Si - Furnizimi me drogë për disa nga qendrat kryesore të tregtimit të Camorras në Napoli dhe provincë, kalonte përmes Holandës dhe Spanjës.

Dhe garantohej nga trafikantët e drogës - disa prej tyre edhe shqiptarë - me ndërmjetësimin nga Dubai të Bruno Carbones, krahut të djathtë të Raffaele Imperiale, bosit të Van Gogh-ut, dy organizata kriminale që shfrytëzonin këtë rrugë për të sjellë kokainë, marijuanë dhe heroinë.

Por të dyja u çmontuan nga një operacion dhe hetim i antimafias italiane i koordinuar nga Prokuroria e Napolit.

Sipas mediave italiane, 29 persona, pjesëtarë të dy organizatave kriminale të dedikuara në trafikun ndërkombëtar dhe shpërndarjen e drogës, janë arrestuar këtë të martë në një operacion të policisë së Napolit në Itali.

Operacioni ka nisur në orët e para të mëngjesit dhe është fokusuar kryesisht në zonën e Sanita. Kështu, janë sekuestruar rreth 100 kg drogë dhe se grupi komunikonte me telefona te enkriptuar.

Pjesë e këtij grupi rezulton edhe Bruno Carbone, italiani i arrestuar në Dubai në nëntor 2022, i kërkuar që nga 2003 dhe i konsideruar një nga trafikantët më të rëndësishëm pas Raffaele Imperiale.

Mes të arrestuarve janë disa shqiptarë dhe organizata trafikonte kokainë, marijuanë dhe heroinë. Rrugëkalimi i drogës ka qenë dhe Holanda e Spanja.

Droga, veçanërisht kokaina, udhëtonte në çanta ose kontejnerë të mëdhenj. Por edhe në nëndetëse. Që ishte bërë mjeti më i sigurt për organizatat kriminale.

Konfirmimi i përdorimit të udhëtimit “nënujor” është zbuluar nga policia italiane gjatë një përgjimi të një bosi shqiptar, mes të arrestuarve në këtë operacion.

Në vitin 2021, duke folur me një bashkatdhetar që sapo kishte zbritur në Napoli, ai reflektoi mbi rrezikun që një transport droge mund të zbulohej nga qentë nuhatës të drogës, nëse transportohej në çanta.

Kontejnerët janë më të sigurt, por me nëndetëset ka më shumë garanci: "Është 100% nën ujë, - thotë ai, - por vetëm nga Panamaja".

Ky është konfirmimi sesi trafiku i drogës po e përdor këtë mjet shtesë transporti, siç është zbuluar tashmë nga policia amerikane gjatë një operacioni antidrogë kohët e fundit.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.