.png)
Gazeta Si - Rafael Leao ishte protagonist kryesor i ecurisë së Milanit drejt titullit të 19-të. Klubi kuqezi nuk do kurrsesi të privohet prej tij dhe në kontratën e re pritet të futë një klauzolë prej 150 milionë eurosh.
Emri i portugezit ka përfunduar në listën e shumë klubeve të pasura, ndaj dhe Milani ka menduar për një klauzolë të tillë. Drejtuesit e klubit italian kanë shumë besim se do të gjejnë akordin me Leaon për zgjatjen e kontratës deri në vitin 2026.
Kontrata aktuale e sulmuesit skadon në 2024-ën. Lojtari ka një pagë prej 1.5 milionë eurosh në sezon. Një shifër që në fakt nuk i përgjigjet vlerës dhe rëndësisë së futbollistit. Prandaj dhe klubet e tjera duan të përfitojnë.
Konfirmimi i Mbape te PSG dhe kalimi i mundshëm i Dembele te kjo skuadër e zbehin pistën franceze. Interesi më i madh për Leaon është në Premier Ligë, me Mançester Sitin në krye, ndaj dhe Milani ka menduar për një klauzolë të lartë.
Klubi kuqezi është gati ta rritë pagën e lojtarit deri në 4.5 milionë euro, por pasi të ketë mbyllur marrëveshjen me ‘RedBird’. Pas këtij momenti do të mbyllen tratativat me 22-vjeçarin luzitan.
@acmilan pic.twitter.com/uCgjD8sl43
— Rafael Leão (@RafaeLeao7) April 13, 2020
Për Leaon ka një problem ndërkohë me ish-klubin e tij. Sipas “Record”, Gjykata e Milanos ka vendosur për çështjen e lojtarit me Sportingun e Lisbonës. Leao duhet t’i paguajë klubit të tij të vjetër shifrën e 16.5 milionë eurove. Bashkë me interesat kjo shifër shkon në 20 milionë euro.
Sulmuesi i Milanit duhet të derdhë në arkat e Sportingut çdo muaj 20% të pagës, rreth 300 mijë euro në muaj. Çështja ka lidhje me vitin 2018, kur lojtari u transferua te Lila. Gjykatat portugeze dhe KAS-i deri tani nuk i kishin dhënë drejtim çështjes.
Rritja e vlerës së Leaos te Milani është e madhe. Klubi ka menduar për një kluazolë stratosferike, sepse nuk do ta humbë në asnjë mënyrë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
