Gazeta Si- Prokuroria e Posaçme ka depozituar një rekurs në Gjykatën e Lartë për Jamarbër Malltezin, dhëndrin e ish kryeministrit Sali Berisha, ku kërkon rikthimin e tij në qeli.
Malltezi, i akuzuar për korrupsion pasiv për aferën e privatizimit të klubit “Partizani”, është vënë në pranga më 21 tetor të këtij viti, ndërsa masa e “arrestit shtëpiak” u caktua më 21 nëntor.
Ishte gjyqtarja Iliriana Olldashi, ajo e cila ndryshoi masën e sigurisë nga ‘arrest me burg’ në arrest shtëpie’ për dhëndrin e Sali Berishës, i cili u arrestua nga SPAK.
Mëngjesin e kësaj të premteje, Apeli i Posaçëm ka rrëzuar kërkesën e Jamarbër Malltezit për kthimin e celularit të sekuestruar dhe dokumenteve të studio “Pustina”.
Masa e sekuestros është lënë në fuqi, kështu që telefoni i Malltezit mbetet në duart e SPAK.
Malltezi akuzohet nga SPAK për “korrupsion aktiv” dhe “pastrim parash”, ndërsa Berisha për veprën penale të “korrupsionit pasiv” në procedimin penal për privatizimin e kompleksit sportiv “Partizani”.
Sipas prokurorisë, dyshimet janë për favorizim në miratimin e ligjeve dhe akteve të tjera për të çuar drejt privatizimit të kompleksit Partizani, i cili ka qenë terren sportive.
Së bashku me ta, nën hetim është edhe Fatmir Bektashi, pronar i kompanisë “Kontakt”, pasi dyshohet se përmes këtij subjekti ka përfituar në mënyrë të padrejtë edhe Malltezi.
Të akuzuarit kanë kundërshtuar akuzat e ngritura, duke theksuar se Malltezi ka përfituar pjesën që i takon si ish-pronar i truallit dhe se ka kryer veprimtari ligjore në kompaninë që ndërtoi mbi sipërfaqe.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
