.png)
Edison Ademi, ish-drejtues i Prokurorisë së Sarandës, pasi u shkarkua në prill të 2019-ës nga KPK-ja, kërcënoi me burg anëtarët e saj, të cilët kishin konstatuar probleme me pasurinë dhe kontakte të tij me persona të përfshirë në trafik droge. KPA-ja (Kolegji i Posaçëm i Apelimit) ka lënë sot në fuqi vendimin e KPK-së për Edison Ademin.
Ish-drejtuesi I Prokurorisë së Sarandës nuk ka justifikuar pasurinë. Konkretisht, ai kishte deklaruar si pasuri të paluajtshme një apartament banimi me sipërfaqe 65 m2, të blerë në 2003-shin me kredi 30000 euro. Por, sipas KPK-së, apartamenti ishte 130 m2, ishte prenotuar në vitin 2003 dhe ishte blerë në vitin 2012, në vlerën e 45 mijë dollarëve. Në fund të seancës dëgjimore me KPK-në, Ademi kërcënoi trupin gjykues me fjalët: "Kjo nuk mbaron këtu, do përballemi sërish, po nuk të futa në burg, mbaje mend".
Vendimi i sotëm i KPA-së
Trupi gjykues i Kolegjit të Posaçëm të Apelimit, i përbërë nga Rezarta Schuetz kryesuese, Ardian Hajdari relator, Albana Shtylla, Natasha Mulaj, Sokol Çomo anëtarë, shpalli vendimin për çështjen (JR) nr.32/2019, datë 09.07.2019, që lidhet me ankimin e subjektit të rivlerësimit Edison Ademi, kundër vendimit nr. 137, datë 09.04.2019 të Komisionit të Pavarur të Kualifikimit.
Në përfundim të gjykimit në dhomë këshillimi, trupi gjykues vendosi
- Lënien në fuqi të vendimit nr. 137, datë 09.04.2019 të Komisionit të Pavarur të Kualifikimit, që i përket subjektit të rivlerësimit Edison Ademi.
- Ky vendim është përfundimtar dhe ka efekt të menjëhershëm.
U shpall sot, në Tiranë, më datë 09.11.2020.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
