Ekonomi

KE: Recesioni i Eurozonës do të jetë më i thellë se parashikimi

Komisioni Europian ka thënë se ekonomia e eurozonës do të zhytet më thellë në recesion sesa mendohej më parë për shkak të efekteve të pandemisë.

Blloku do të tkurret në një rekord prej 8.7% këtë vit para se të rritet 6.1% në 2021.

Krahasimisht me parashikimin e KE të majit flitej për një rënie prej 7.7% dhe 6.3% rritje në 2021.

Franca, Italia dhe Spanja do të vuajnë më shumë, tha KE.

Parashikimi i rishikuar vjen mes shqetësimeve në lidhje me ekonominë amerikane pas një rritje të infeksioneve.

Kjo ka bërë që disa shtete të vonojnë hapjen ose të kthejnë kufizimet.

Komisioneri Valdis Dombrovskis tha në një deklaratë se: “Ndikimi ekonomik i bllokimit është më i rëndë se sa prisnim fillimisht.

“Ne vazhdojmë të lundrojmë në ujëra të stuhishme dhe të përballemi me shumë rreziqe, duke përfshirë një valë tjetër të madhe të infeksioneve.”

Komisioni rishikoi parashikimet e tij të mëparshme sepse heqja e masave të bllokimit të koronavirusit në vendet e eurozonës po zgjaste më shumë nga sa kishte menduar fillimisht.

Parashikimet e mëparshme të rritjes për Francën, Italinë dhe Spanjën u shkurtuan pasi u goditën shumë nga pandemia, dhe KE tani pret që rëniet të jenë më të larta se 10% këtë vit në secilin vend.

Në kontrast me tablon e përgjithshme të eurozonës, Gjermania, e cila kishte më pak vdekje nga Covid-19, do të ketë një tkurrje prej 6.3%, më pak e theksuar sesa parashikimi i majit prej 6.5%.

Zvarritja ekonomike

Parashikimi i fundit i KE supozon se nuk do të ketë një valë të dytë të infeksioneve që çojnë në kufizime të reja të bllokimit. Sidoqoftë, supozon se masat distancuese sociale vazhdojnë dhe masat e politikës monetare dhe fiskale mbështesin rimëkëmbjen.

Rreziqet kryesore përfshijnë një valë të mundshme të infeksioneve të reja, plagë që do të zgjasin gjatë nga kriza, përfshirë papunësinë dhe falimentimet e korporatave, dhe mungesën e një marrëveshjeje tregtare Brexit BE-Mbretëri e Bashkuar.

Raporti citon që mosarritja e një marrëveshjeje tregtare Brexit mund të rezultojë në rritje më të ulët, veçanërisht për Mbretërinë e Bashkuar.

“Në nivelin global, niveli akoma në rritje i infeksioneve, veçanërisht në SHBA dhe tregjet në zhvillim, ka përkeqësuar perspektivën globale dhe pritet të veprojë si një ndikim i fortë negativ në ekonomisë europiane,” citon raporti.

Megjithëse SHBA-të kanë vendosur politika “të guximshme” fiskale dhe monetare, raporti thotë se, “shkalla në rritje e infeksioneve të reja amerikane pritet të peshojë në besimin e konsumatorit dhe biznesit”.

Disa plane të rihapjes janë vënë në pritje dhe janë vënë kufizime për baret, restorantet dhe kompanitë e tjera të industrisë së mikpritjes që ndihmuan ekonominë amerikane të shtojë 4.8 milion vende pune në qershor.

Burimi: BBC. Solli në shqip: Gazeta “Si”

Copyright © Gazeta “Si”

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.


Copyright © Gazeta “Si”



Më Shumë