.png)
Nga Gazeta ‘Si’- Viti 2024 nisi me rritje të flukseve hyrëse turistike drejt Shqipërisë.
Gjatë janarit, në vendin tonë erdhën 489.599 turistë të huaj ose 30% më shumë se e njëjta periudhë e vitit të shkuar.
Sipas të dhënave të përpunuara nga Ministria e Turizmit dhe Mjedisit, në krye të listës renditen shtetasit e Kosovës, me 215 mijë vizitorë ose rreth 30% më shumë krahasuar me të njëjtën periudhë të një viti më pare.
Ata ndiqen nga vizitorët italianë të cilët kanë qenë 53 mijë ose 50.4% më shumë, ndërsa të tretët renditen vizitorët e Malit të Zi me 52.662 hyrje ose 32.6% krahasuar me janarin e vitit të mëparshëm.
Po ashtu, ndër grupet me rritjen më të lartë të hyrjeve turistike në krahasim me një vit më parë, renditen hyrjet nga Polonia me një rritje 411%, Rumania me mbi 120%, Spanja me rritje 104%.
Prurjet nga Polonia kanë qenë gjithmonë të larta dhe vizitorët vijnë përmes turizmit të organizuar me charter ndërsa turistët nga Spanja janë katërfishuar dy vitet e fundit për shkak të hapjes së linjave direkte të fluturimit.
Ministrja e Turizmit Mirela Kumbaro e ka cilësuar vitin 2024 si një sfidë e përgjegjësi të madhe për të përballuar me sukses flukset e shtuara turistike. 2023-shi deri tani konsiderohet si viti më i mirë i turizmit në Shqipëri gjatë të cilit erdhën 10 milionë turistë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
