Izmir Smajlaj, atleti shqiptar i kërcimit së gjati, është shpallur sot kampion në Ballkaniadën e sallave të mbyllura në Stamboll. Shkodrani ka zënë vendin e parë në disiplinën e tij, duke kërcyer 7.91 metra. Një nisje shumë e mirë e sezonit kjo për Smajlajn.
“Një garë e vështirë, me konkurrues nga 21 shtete ballkanike dhe jo vetëm. I lumtur për rezultatin prej 7.91 m dhe vendin e parë në këtë kompeticion të rëndësishëm dimëror. Falënderime të veçanta për trajnerin tim të palodhur, z.Gjergj Ruli, familjen time, Ks Tiranën, Bashkinë e Tiranës, Komitetin Olimpik Kombëtar Shqiptar (KOKSH), FSHA-në dhe të gjithë ju mbështetës të sportit të bukur të atletikës!”, - shkruan atleti shkodran në faqen e tij në Facebook.
Në këtë Ballkaniadë do të garojë për Shqipërinë edhe Franko Burraj, edhe ai shkodran. Burraj synon të fitojë medaljen e artë në garën e 400 metrave. Atletika shqiptare mund të kthehet kampione e dyfishtë nga Turqia, nëse edhe Burraj imiton Smajlajn.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.