.png)
Indeksi i Çmimeve të Konsumit në muajin Mars 2022, arriti 5.7% ndikuar më së shumti nga çmimet e ushqimeve dhe pijeve joalkoolike me 3.3% rritje.
Inflacioni i marsit është 2.4% më i lartë se sa muaji shkurt 2022, kur nisi lufta dhe tronditi tregjet ekonomike në të gjithë Europën.
Transporti gjithashtu, ka ndikuar me 1.08%, ndjekur nga qiraja, ujë, energjia elektrike me 0.44%.
Në raport vjetor, rritjen më të madhe e ka pasur transporti, me 20%, lidhur kjo me çmimin e naftës. Ndjekur nga ushqimet dhe pijet joalkoolike, me 9.3%.
Inflacionin më të lartë në këtë grup e kanë vajrat dhe yndyrnat me 22.4%. Buka dhe drithërat me 15.8%.
Inflacioni 5.7% është më i lartë ndonjëherë, të paktën për 20 vitet e fundit. Ministrja e Financave dhe Guvernatori i Bankës kanë lajmëruar për një zgjatje të inflacionit, por në një mesatare të 4.5%.
Inflacioni është një tjetër problem i shtuar i ekonomisë botërore momentalisht, përveç krizës gjeopolitike Rusi-Ukrainë dhe problemeve me furnizimin. Në Europë kjo po ndikohet nga rritja e çmimeve të lëndëve energjitike, naftë, gaz, elektricitet etj.
Nafta arriti nivelet maksimale në ditët e para të muajit mars, duke kapur vlerën e 270 lekë/litër në pikat e tregtimit në Shqipëri. Ndërkohë vazhduan luhatjet dhe rritjet e shpeshta në produktet e shportës dhe të gjithë shërbimet e tjera. Vrojtimi i Bankës së Shqipërisë për të ardhmen, me biznese dhe konsumatorë, raportoi pritshmëri për rritje të mëtejshme të çmimeve në vend.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
