Inflacioni i Eurozonës ra në janar, por mbetet më lart se parashikimet

Inflacioni i Eurozonës u ngadalësua në 2.8% në janar, por rënia e çmimeve ishte më e vogël se sa prisnin ekonomistët pas rënies së kostove të energjisë dhe ushqimit.

Rënia e normës totale të inflacionit të eurozonës, pasi arriti në 2.9% në dhjetor, do të mbështesë pritjet e investitorëve se Banka Qendrore Europiane mund të ulë normat e interesit që në fillim të kësaj pranvere.

Eurostat, dega statistikore e BE-së, tha të enjten se çmimet e shërbimeve u rritën me një normë vjetore prej 4% për të tretin muaj radhazi në janar.

Inflacioni bazë, duke përjashtuar kostot më të paqëndrueshme të energjisë dhe ushqimit për të dhënë një ide më të mirë të presioneve themelore të çmimeve, mbeti pak më i lartë se sa prisnin ekonomistët, pavarësisht nga ngadalësimi nga 3.4% në dhjetor në 3.3% në janar. Ekonomistët kishin parashikuar një normë bazë prej 3.2% në një sondazh të Reuters.

“Ndërsa normat totale dhe ato bazë të eurozonës ranë, politikëbërësit ka të ngjarë të shqetësohen se inflacioni në sektorin e shërbimeve ka ngecur,” tha Jack Allen-Reynolds, një ekonomist në konsulentët Capital Economics.

Yield-t e obligacioneve të qeverisë europiane u rritën përsëri të enjten, ndërsa investitorët gjykuan se të dhënat ulën shanset për një ulje të hershme të normës nga BQE.

Bankat qendrore perëndimore po peshojnë rrezikun e një ringjalljeje të presioneve të çmimeve nëse ulin kostot e huamarrjes shumë herët kundër rrezikut për të shkaktuar dëme të panevojshme për rritjen ekonomike dhe vendet e punës duke pritur më shumë se ç'duhet.

Jay Powell, kryetar i Rezervës Federale të SHBA, u tërhoq kundër basteve të investitorëve se mund të ulë normat që në mars, duke thënë të mërkurën se ky nuk ishte "rasti". Të enjten, guvernatori i Bankës së Anglisë, Andrew Bailey, tha se kishte nevojë për "më shumë prova" të disinflacionit përpara se të ulte normat.

Presidentja e BQE-së Christine Lagarde tha javën e kaluar se ishte “e parakohshme të diskutohej për uljet e normave” edhe pse pritej që inflacioni të “lehtësohej më tej gjatë vitit”.

Pasi ekonomia e eurozonës ngeci për pjesën më të madhe të vitit të kaluar, investitorët kanë vënë bast se BQE-ja do t'i përgjigjet ftohjes së shpejtë të presioneve të çmimeve duke ulur normën e saj standarde të depozitave nga rekordi i saj aktual prej 4 për qind që në prill.

Ndërsa inflacioni vjetor mbetet mbi objektivin prej 2 për qind të BQE-së, rritja mujore e çmimeve ka qenë në prirje nën këtë nivel që nga vjeshta e kaluar. Mes dhjetorit dhe janarit, çmimet e eurozonës ranë 0.4 për qind.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.