.png)
Kryetari i PD-së, Sali Berisha tha të mërkurën në një deklaratë për mediat se një hetim i publikuar një ditë më parë nga Partia e Lirisë mbi inceneratorët tregon se Rama dhe Veliaj janë të përfshirë në këtë aferë.
Berisha iu referua videove të publikuara nga Monika Kryemadhi ku vërehej se plehrat në Tiranë vetëm groposeshin dhe se ndryshe nga sa thuhet në kontratë, qytetarët e Tiranës paguajnë 29 euro për ton aq sa është parashikuar për të gjitha proceset, ndërkohe që groposja apo kapsulimi është vetëm njëra prej tyre.
“...Kompania e Ramës dhe Veliajt ka një kontratë për fushën e Sharrës. Aty thuhet se për çdo ton plehrash të depozituar në fushën e Sharrës, bashkitë do paguajnë 11 euro nëse ato nuk digjen dhe do paguajnë 29 euro në rast se ato digjen.
Prej gjashtë vitesh në fushën e Sharrës nuk është djegur asnjë kg pleh, bashkitë e Tiranës, qytetarët e Tiranës, paguajnë për çdo ton, jo 11, por 29 euro.
Çka do të thotë se 16 apo 17 euro, përfundojnë në kontot bankare të Edi Ramës dhe Erion Veliajt.
Ja se si Sharra është minierë floriri e Ramës dhe Erion Veliajt. Hetimi, investigimi i publikuar dje, faktonte në mënyrën më të pakundërshtueshme se plehrat, mbetjet jo vetëm nuk seleksionoheshin sipas natyrës së tyre, por groposen si 20 vite më parë, pa asnjë veçim, pa asnjë seleksionim, pa asnjë djegie.
Rama dhe Veliaj kanë vjedhur 54 milionë euro.
Pra, të gjitha plehrat që qytetarët i veçojnë në kosha, bashkohen dhe groposen si 20 vite më parë. Ky është një mashtrim, një vjedhje e paimagjinueshme”, tha Berisha, duke ftuar qytetarët që të ngrihen në protestë, pasi sipas tij drejtësi nuk mund të gjendet as nga SPAK .
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
