Ilaçet e diabetit ngadalësojnë simptomat e Parkinsonit

Në një provë klinike të botuar së fundmi është vërtetuar se ilaçet e diabetit ngadalësojnë simptomat e Parkinsonit.

Ky studim tregon se si pacientët e Parkinsonit të trajtuar me lixisenatide, një ilaç për diabetin, ruajtën aftësitë e tyre motorike pa ndryshime të mëdha për një vit.

“Ne filluam të hetojmë falë të dhënave që kishim”, shpjegon Olivier Rascol, neurolog në Universitetin e Toulouse dhe autori kryesor i hulumtimit.

Pacientët me diabet të tipit 2 kanë një rrezik më të lartë të zhvillimit të Parkinsonit sesa pjesa tjetër e popullsisë. Është një trend që është vënë në dukje në studime të ndryshme.

“Nga ana tjetër, ne pamë se pacientët diabetikë që trajtoheshin me këtë lloj mjekimi kishin një rrezik më të ulët të zhvillimit të Parkinsonit sesa ata që merrnin medikamente të tjera,” shpjegon autori.

Studimi filloi në vitin 2014 me 156 pacientë të cilët u rekrutuan në fazat fillestare të sëmundjes. Gjysmës iu dha lixisenatide për 12 muaj. Pjesa tjetër mori një placebo. Pas kësaj kohe, ata zbuluan se ky grup i fundit kishte zhvilluar simptoma më serioze të Parkinsonit me tre pikë (në një shkallë që mat se sa mirë njerëzit mund të kryejnë detyra të tilla si të folurit, ngrënia dhe ecja). Ata që ishin trajtuar me lixisenatide mbetën në nivele të qëndrueshme.

“Këto tre pika dallimi janë të rëndësishme, por jo dramatike. Është një ndryshim i vogël,” vlerëson Alvaro Sanchez Ferro, neurolog. “

Gjëja interesante, thekson doktori Sanchez Ferro, i cili nuk ishte i përfshirë në studim, është verifikimi i këtij efekti neuroprotektiv. Dhe gjëja revolucionare do të ishte të kontrollohej nëse kjo diferencë prej tre pikësh vazhdon të rritet me kalimin e viteve.

Gjëja e rëndësishme për këtë trajtim nuk është vetëm ajo që ai arrin, por si e bën atë: duke trajtuar problemin në rrënjë.

“Parkinson është një sëmundje neurodegjenerative, ka zona të ndryshme të trurit që dëmtohen, që humbasin neuronet," shpjegon Dr. Sanchez Ferro.

Por si mundet një ilaç i krijuar për diabetin të ketë një efekt neuroprotektiv në tru?

"Ne e dimë se receptorët e insulinës ekzistojnë gjithashtu në tru," thotë Rascor.

Ato janë thelbësore për rregullimin e niveleve të glukozës në gjak dhe në organe të ndryshme. Por ata janë të përfshirë edhe në mbijetesën e neuroneve. Kur një person ka Parkinson, këta receptorë fillojnë të dëmtohen.

“Në këto rajone ne shohim anomali që të kujtojnë rezistencën ndaj insulinës. Anomalitë që ngjajnë me ato që ndodhin me diabetin.”

Ilaçet jo vetëm që veprojnë në zorrë, por edhe në tru. Lixisenatide është një nga ilaçet që ka efektin më të madh në nivelin neuronal.

Për momentin, ajo që është e qartë është marrëdhënia midis dy sëmundjeve shumë të ndryshme, por që mund të kenë një zgjidhje të përbashkët.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.