Gazeta Si - Me një njoftim shumë të thatë zyrtar Vllaznia ka bërë të ditur mbylljen e bashkëpunimit me trajnerin Tomas Bërdariç. Ikja e gjermanit në fakt u paralajmërua që pas humbjes me Tiranën, kur presidenti Alban Xhaferi u shpreh se askush nuk është i paprekshëm. Drejtimi i skuadrës do t’i besohet Elvis Plorit, ndihmësit të Bërdariç.
“Klubi i Futbollit Vllaznia njofton se ka vendosur ndërprerjen e marrëdhënies me trajnerin Tomas Brdariç. Në vazhdimësi ekipi do të drejtohet nga trajneri Elvis Plori. Me këtë rast, falenderojmë trajnerin Brdariç për të gjithë kontributin e dhënë dhe i urojmë suksese ne karrierën e tij”, - shkruhet në njoftimin zyrtar të klubit shkodran.
Ndarja me trajnerin Bërdariç, i ardhur në Shkodër që sezonin e kaluar, vjen në një moment kyç të sezonit. Vllaznia mban vendin e katërt në kampionat, larg pritshmërive, edhe pse shanset për në Europë janë reale.
Bërdariç ka lënë përshtypje të mira sidomos sezonin e kaluar, kur Vllaznia e tij luante një futboll argëtues. Këtë sezon skuadra shkodrane ka pasur shumë oshilacione dhe tashmë ka ardhur largimi i trajnerit. Më shumë duket një krisje mes palëve, sepse Vllaznia ka mundësi ta realizojë objektivin, kur janë luajtur 25 javë kampionati.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.