.png)
Gazeta Si - Vrasjet e grupit të Laert Haxhiut pas dëshmisë së bashkëpunëtorit të drejtësisë Artan Tafani, kanë mbledhur këtë të mërkurë krerët më të lartë të SPAK-ut dhe Byrosë Kombëtare të Hetimit.
Në ambientet e Prokurorisë së Posaçme në Tiranë, ka qenë i pranishëm edhe drejtuesi i Prokurorisë së Elbasanit, Kreshnik Ajazi.
Sipas burimeve paraprake, në takim po diskutohet për grupin e Laert Haxhiut, që u godit javën e kaluar gjatë operacionit “Kurrë mos harro” pas dëshmisë së Artan Tafanit.
Ky i fundit, anëtar i bandës së Laert Haxhiut, u bë bashkëpunëtor i drejtësisë dhe rrëfeu krimet e këtij grupi.
Hetimi u drejtua nga Prokuroria e Elbasanit dhe pritet që t’i kalojë SPAK-ut për kompetencë, e për këtë arsye besohet se drejtuesi Kreshnik Ajazi është takuar me drejtues të Prokurorisë Speciale.
Nga dëshmia e Tafanit u zbardhën 6 vrasje si dhe krime të tjera, por që një pjesë tjetër janë ende në proces verifikimi dhe hetimi.
31-vjeçari Haxhiu aktualisht ndodhet në burg në Greqi dhe akuzohet si pjesëmarrës dhe organizator.
Ndërsa në Shqipëri, në pranga u vendosën 12 persona, të cilët u lanë nga gjykata në “arrest në burg”, ndërsa 4 të tjerë janë ende në kërkim.
Sipas dëshmisë së Artan Tafanit, grupi i Laert Haxhiut kishte planifikuar të vriste dy prokurore.
Fillimisht ishte prokurorja e Lushnjës, Merita Selimi, e cila mblodhi provat dhe dëshmitë për vrasjen e Zamir Latifit dhe Jurgen Hoxhës.
Ajo ngriti akuzën “grup kriminal” dhe dosja më pas i kaloi Prokurorisë së Posaçme. Në SPAK hetimet u drejtuan nga prokurorja Doloreza Musabelliu.
Si Selimi, ashtu edhe Musabelliu u morën menjëherë në mbrojtjen e strukturave policore për garantimin e sigurisë së tyre.
Dëshmia e Tafanit mblodhi të hënën në Këshillin e Lartë të Prokurorisë drejtuesit më të lartë të institucioneve të drejtësisë dhe sigurisë.
Ministri i Brendshëm, Taulant Balla, drejtuesi i SPAK Altin Dumani, drejtori i Përgjithshëm i Policisë Muhamet Rrumbullaku, si dhe kreu i Gardës Gramos Sako zhvilluan një takim për të diskutuar për kuadrin ligjor për mbrojtjen e magjistratëve, si dhe për të diskutuar mbi rastet e fundit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
