Hapja e listave dhe ndalimi i koalicioneve parazgjedhore, miratuar nga Komisioni i Ligjeve dhe Këshilli i Legjislacionit një ditë më parë nuk ka kënaqur opozitën parlamentare që ka votuar kundër këtë të mërkurë draftin PS-PD-LSI të 5 qershorit.
Komisioni i Ligjeve miratoi në parim me 10 vota pro të mazhorancës dhe 5 kundër të opozitës parlamentare këtë draft. Opozita parlamentare këmbëngul tek depolitizimi i administratës zgjedhore. Fill pas kësaj vote, Kryeministri Edi Rama reagoi në rrjetet sociale.
Myslim Murrizi, që në këtë mbledhje të Komisionit të Ligjeve mori pjesë si i ftuar, akuzoi socialistët për lojë të dyfishtë dhe i paralajmëroi se brenda datës 30 korrik, kur duhet të jetë vendosur për fatin e të dyja nismave, si të opozitës parlamentare, ashtu edhe të opozitës jashtëparlamentare.
“Ju më kujtoni atë shprehjen, mirë me vjehrrën, mirë me burrin, llafi i mirë zbut dhe gurin! Por ka ardhur koha dhe deri më datë 30 duhet ta ndani, o me vjehrrën, o me burrin”, tha ai.
Socialistë thanë se propozimi është depozituar si nismë deputetësh për shkak të pamundësisë së opozitës jashtëparlamentare për të votuar. Por, deputetët e opozitës parlamentare akuzuan se Këshilli Politik, një organ ekstraligjor nuk mund t’i imponohet Kuvendit dhe kërkuan rrëzimin e draftit.
Ralf Gjoni dhe Myslim Murrizi vunë në pikëpyetje ligjshmërinë e këtij organi, ndërsa thanë se marrëveshja e arritur më 5 qershor nuk adreson asnjë rekomandim të OSBE/ODIHR.
Ndërkohë, socialisti Damian Gjiknuri tha se hapja e listave me sistemin aktual proporcional rajonal mund të sjellë tensione, por fton kolegët deputetë që të mos kenë frikë nga kjo dhe ta miratojnë atë.
“Hapja e listave mund të sjellë tensione dhe probleme. Por, nuk duhet të kemi droje për këtë”, u shpreh ai.
Gjiknuri, që përfaqësoi socialistët në Këshillin Politik në bisedimet me PD dhe LSI foli në Komisionin e Ligjeve si bashkëkryetar i Komisionit të Posaçëm të Reformës Zgjedhore për të prezantuar ndryshimet e propozuara në Kodin Zgjedhor sipas marrëveshjes së 5 qershorit me opozitën jashtëparlamentare.
Sipas Gjiknurit propozimet adresojnë që të gjithë shqetësimet e ngritura nga opozita jashtëparlamentare.
“Nuk arriti që të adresojë të gjitha rekomandimet e OSBE-së, pasi më shumë se standardi i ODHIR prevaloi interesi politik. Por, janë reflektuar të gjitha kërkesat e opozitës jashtëparlamentare”, deklaroi Gjiknuri.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.