Dy figura të njohura të futbollit shqiptar, ish-trajneri i Kombëtares Astrit Hafizi dhe ish-kapiteni i saj, Rudi Vata, kanë mbajtur qëndrim mjaft kritik pas barazimit në Kazakistan. Hafizi i ka përqendruar kritikat te trajneri Edi Reja, kurse Vata, përveç italianit, ka mbajtur qëndrim edhe për sjelljen e futbollistëve në fushë.
Hafizi është ndalur te disa detaje teknik të ndeshjes për të evidentuar vendimet e gabuara të Rejës. “Është shumë shpejt të pretendojmë që Broja të shënonte. Kemi edhe shumë punë, nuk e di a e kupton trajneri Reja. Ai arriti vetëm atë që skuadra të mos dilte e humbur. Fituam me Bjellorusinë që ishte e fikur. Po vazhdojmë me të njëjtin stil, Reja jep mendime të holla, sporadike dhe të sipërfaqshme. Kur luan me 3 mbrojtës dhe nuk pëson gol, është një shtysë e mirë për ta fituar ndeshjen. Duhen ndryshime në sulmues, sepse kur luan me 3 mbrojtës, 2 lojtarët para mbrojtjes duhet të jenë ndërtues shumë të mirë. Në rastin tonë, Bare dhe Abrashi nuk janë në kondicionin e duhur.
Kallaku mund të luante pas 2 sulmuesve me cilësitë që ka. Sulmuesi i vetëm ishte Broja, kurse Manaj, nëse kthehet mbrapa, i bie forca fizike dhe nuk gjuan asnjëherë në portë. Në ndeshjen me Kazakistanin, kur u pa që kundërshtari ishte “i vdekur”, mund të luante një sulmues në krahun e djathtë, në vend te Veselit, për të dribluar”, - theksoi Astrit Hafizi, ish-trajner i Kombëtares, pas barazimit në Kazakistan. Ai mbetet skeptik për skemën 3-5-2 të zgjedhur nga trajneri Reja.
Vata nuk sheh entuziazëm e grintë
Kritik ka qenë edhe Rudi Vata, ish-kapiten i Kombëtares. Ndryshe nga Hafizi, Vata ka kritikuar jo vetëm trajnerin Reja, por edhe futbollistët. Sipas tij, ata nuk kanë grintën për t’i fituar ndeshjet. “Duhej të kishim 9 pikë dhe ekipe si Kazakistani duhet t’i dominojmë. Gjendja fizike nuk është optimale, ndërsa Broja ato raste i krijoi prej aftësive individuale, ai mbeti vetëm. Kallaku u lodh pas minutës së 65-të, i ra kreativiteti. Mendoj se humbën dy pikë të rëndësishme. Përderisa trajneri bën zëvendësime, do të thotë që nuk ka besim tek ata që ka në dispozicion.
Nuk shoh entuziazëm në Kombëtare, as te stoli dhe as te stafi. Tramexani ishte i rëndësishëm për De Biazin, tani nuk ka një lidhje kimike. Lojtarët e rinj kanë talent, por kanë pak eksperiencë. Kazakistani luajti prapa, priti vetëm ndonjë kundërsulm, kurse ne nuk krijuam presionin e duhur. Kemi djem të gjatë dhe të pashëm që luajnë në Serinë A, por nuk kanë grintën e Canës për ta fituar ndeshjen. Nuk kanë një shembull si të fitojnë.
Me Lituaninë dhe Kazakistanin të marrësh një pikë është humbje e madhe. Shqipëria ka pretendime të mëdha, futbollistët tanë duhet të mendojnë sikur ata janë Seria A dhe përballë kanë skuadra të Serisë C. Nuk vazhdohet me justifikime, duhet analizuar çfarë bëmë keq. Trajneri ynë analizon vetëm ekipin e tij, nuk e studion fare kundërshtarin. Trajneri i Lituanisë që mori 3 pikë ndaj nesh, e kishte analizuar Shqipërinë me detaje.
Skema 3-5-2 mund të jetë mirë për ne, por duhet të llogarisim edhe kundërshtarin. Kazakistanin nuk duhej ta linim të merrte frymë. Në 3 ndeshje kemi marrë 4 pikë dhe kemi shënuar 2 gola. Shumë pak dhe nuk kemi pse të paguajmë trajner të huaj. Edhe trajnerët e Superiores sonë nuk do të bënin keq se Reja, më mirë t’u japim mundësi trajnerëve shqiptarë”, - tha mes të tjerash ish-kapiteni i kuqezinjve, Rudi Vata.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.