Antuan Grizman zyrtarizoi largimin nga Atletiko Madrid me një video të shpërndarë në profilet e rrjeteve sociale të klubit spanjoll. Ndeshja me Levanten do të jetë e fundit për të me fanellën e ekipit spanjoll dhe tani e pret Barcelona, siç shkruan shtypi spanjoll, por edhe “NY Times. “Pasi fola me klubin, dua të flas me ju për vendimin e largimit nga Atletiko Madrid. Kam dëshirë për sfida të reja. Atletiko është klubi që më ka dhënë trofetë e parë dhe tifozët më kanë dhënë shumë dashuri. Kanë qenë 5 vite të jashtëzakonshëm dhe ju falënderoj përzemërsisht”, - shprehej francezi në videon e lajmit të largimit.
Pavarësisht zgjatjes së kontratës me Atletikon para Botërorit dhe një klauzole prej 200 milionë eurosh, në Spanjë evidentojnë faktin se kontrata e firmosur nga Grizman parashikon një ulje në 120 milionë euro, duke nisur nga 1 korriku. Klubi spanjoll do të arkëtojë 96 milionë euro nga shitja e sulmuesit, sepse 20% e shumës shkon për Real Sociedadin. Vitet e fundit është folur shumë për largimin e tij nga Atletiko dhe kalimin te Barcelona, por gjithçka ishte përgënjeshtruar nga vetë lojtari ose klubi. Tani largimi është zyrtar dhe sulmuesi francez duket i destinuar të veshë fanellën e Barcelonës. Grizman është kërkuar edhe nga disa klube të mëdha në Europë, por emri i tij lidhet më shumë me Barcelonën.
Një vit më parë francezi i refuzonte katalanasit për të qëndruar tek Atletiko. Madje, ishte një refuzim spektakolar, me një video që zgjaste rreth 40 minuta dhe në fund zbulonte vendimin e Grizman për të ardhmen. Në video shfaqeshin momentet më të bukura të francezit me fanellën e Atletikos dhe në fund pyetja: “Çfarë vendimi ke marrë?” Përgjigja ishte: "Vendosa të qëndroj”. Një video edhe këtë radhë, por fundi është ndryshe. Grizman do të largohet. Barcelona e pret.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.