Eros Grezda ka bërë një gjest të turpshëm në Skoci, që duket se i ka vënë vulën largimit të tij nga Gllasgou Rejnxhërs. Lojtari i Kombëtares (nuk është grumbulluar nga trajneri Edi Reja në ndeshjet e fundit), ka pështyrë lojtarin kundërshtar, Endrju Bërn, gjatë një ndeshje që ai po luante me 21-vjeçarët e Rejnxhërs ndaj Balimena Junajtid. Një veprim i papranueshëm, që ka sjellë reagimin e gjithë lojtarëve kundërshtare dhe trajnerit të tyre.
Një gjest shumë i shëmtuar, por sulmuesi anësor e ka thelluar edhe më tej skandalin, duke mos pranuar as të kërkojë falje. Një situatë që ka lënë të shtangur edhe shokët e ekipit të Grezdës dhe që e ka detyruar kapitenin Greg Doçerti të shkojë në dhomat e zhveshjes të kundërshtarit për të kërkuar falje. Drejtuesit e klubit të madh skocez, Gllasgou Rejnxhërs, janë treguar të përmbajtur për momentin, duke pohuar thjesht se do të merren masa ndaj Grezdës.
Megjithatë, nuk ka vonuar dhe sipas asaj që raporton shtypi sportiv skocez, trajneri Stiven Xherrad e ka thënë qartë se Grezda nuk mund të mbajë më fanellën e Rejnxhërs, pasi ka pështyrë kundërshtarin. Trajneri anglez e kishte lënë Grezdën jashtë skuadre, duke e konsideruar të panevojshëm. Sulmuesi stërvitej dhe luante me të rinjtë, por tani ka katranosur gjithçka dhe trajneri i ka treguar derën, duke mos i lënë asnjë shans.
Është një periudhë shumë negative për Eros Grezdën, i cili disa muaj më parë la grumbullimin e Kombëtares, pas një përplasjeje me trajnerin Edi Reja, pasi ky i fundit e kishte lënë jashtë formacionit. Grezda me arrogancë i ishte drejtuar trajnerit se ai luan me Gllasgou Rejnxhërs dhe nuk mund të qëndronte në stol, ndaj dhe u largua, ndërsa për shtypin sportiv u justifikua me një dëmtim. Reja sqaroi për këtë përplasje se ishte një vendim i vetë lojtarit dhe për dy ndeshjet e fundit nuk e grumbulloi, aq më tepër që nuk ka luajtur. Tani problemet e Grezdës janë bërë edhe më serioze. Ai ka nevojë të rehabilitohet, me shumë mundësi, me një skuadër tjetër.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.