Merkato është mbyllur zyrtarisht te të gjitha kampionatet e rëndësishme europiane. Një verë e gjatë me shumë lajme dhe shumë lëvizje të bujshme ka ulur siparin mbrëmjen e djeshme. Por siç tashmë është bërë traditë edhe në ditën e fundit disa klube të rëndësishme europiane kanë bërë goditjet e fundit në merkato.
Më aktive ka qenë PSG, e cila në ditën e fundit ka bërë dy afrime zyrtare në merkato. Mauro Ikardi dhe Kejlor Navas janë dy përforcimet e fundit të parisienëve. Portieri kostarikan u shkëmbye kokë më kokë me portierin francez, Areola që do të veshë fanellën e Real Madrid.
Nëse për Navas nuk pati ndonjë dilemë prej ditësh, pasi çdo gjë ishte mbyllur me Real Madrid dhe dje vetëm prezantimi kishte mbetur, për Ikardin diskutimi është shumë i ndryshëm. Argjentinasi ishte një telenovelë shumë e gjatë këtë verë me Interin që ia kishte treguar derën që në muajin korrik. Shumë zëra dhe lajme pa fund për kalime të mundshme për Ikardin, por në fund fanella e tij e re do të jetë më numrin 18 te PSG, ku e pret një sezon i vështirë, pasi kundërshtarë reparti ka një “vrasës” si Edinson Kavani.
Por shumë aktive në orët e fundit të merkatos ishin dhe ekipet italiane. Roma, Milan dhe Torino bën disa lëvizje sidomos në repartin e sulmit. Milani arriti më në fund të merrte sulmuesin që deshi gjatë gjithë verës. Nuk ishte Korrea, por kroati Ante Rebiç. Ky i fundit u zyrtarizua vetëm në orën 20:00 dhe vendimtar në këtë tratativë ishte Zvonimir Boban. Ishte pikërisht Boban që arriti të bindte patriotin e tij Rebiç se është i duhuri për t’ju bashkuar Piatek në majën e sulmit kuqezi.
Edhe goditja e Romës në minutën e fundit ishte e bujshme. Armeni Henrik Nikitarian ekzaltoi të gjithë tifozët verdhekuq, që tashmë mund t’i gëzohen një dyshe sulmues Xheko-Nikitarian që do të luftojë për tu futur në zonën Champions. Edhe goditja e Torinos, që mori nga Napoli Simone Verdi bëri bujë në mediet italiane. “Demat” kanë bërë një start shumë të mirë këtë sezon dhe me përforcimet e kësaj vere synojnë të kapin zonën Europa League, aty ku këtë sezon nuk shkuan dot pasi u mposhtën nga Uolvs në play off.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.