.png)
Gazeta Si - Gjykata e Posaçme ka dënuar me burg përjetë Laert Haxhiun, të akuzuar për atë që njihet si “Masakra e Lushnjës” në shtator të 2017.
Rreth dy javë më parë Prokuroria e Posaçme i kërkoi gjykatës të shpallë fajtor Laert Haxhiun dhe ta dënojë atë me burgim të përjetshëm, si autori kryesor i ngjarjes së rëndë me 2 të vrarë dhe 2 të plagosur në vitin 2017.
Për avokatin e Haxhiut, Detar Hysi, vendimi i GJKKO-së nuk është objektiv. “Gjykata e Posaçme ka tejkaluar kompetencat duke mos dhënë një vendim objektiv dhe të paanshëm. Thjesht ka skanuar kërkesën e Prokurorisë së Posaçme! Me këtë vendim të ndikuar nga faktorë të jashtëm ka hapur një sagë vrasjesh në qytetin e Lushnjes, duke e kthyer Lushnjen në një Palermo të vërtetë!”, tha avokati.
Haxhiu mbahet i arrestuar në Greqi prej rreth një viti, ndërsa drejtësia shqiptare ka kërkuar ekstradimin e tij, pasi rezulton i përfshirë edhe në ngjarje të tjera kriminale.
Laert Haxhiu së bashku me Anterio Kaloshin dhe Orges Bilbilin, të dënuar me burgim të përjetshëm, akuzohen për “Masakrën e Lushnjës”, ngjarje ku mbetën të vrarë Zamir Latifi dhe Jurgen Hoxha si dhe u plagosën Marjus Xhepexhiu dhe Bujar Turku.
Sipas hetimeve të kryera nga Prokuroria e Posaçme, objektivi i autorëve ishte Xhuljo Shkurti, nipi i Aldo Bares, i cili ishte kthyer në Shqipëri një ditë para këtij krimi. Por pak çaste para ngjarjes, ai u shkëput nga shokët dhe shkoi për tu qethur, duke i shpëtuar kështu atentatit.
Shkak për ngjarjen e Lushnjës, u bë një konflikt i vjetër që familja Haxhiu kishte me familjen Bare. Banda e Aldo Bares i dogji banesën xhaxhait të Laert Haxhiut, për këtë shkak, ky i fundit vendosi të hakmerret.
Laert Haxhiu ndodhet i arrestuar në Greqi dhe pritet vendimi i gjykatës së Apelit nëse do të ekstradohet në Shqipëri.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
