.png)
Diego Pablo Simeone në qendër të kritikave. Jo të drejtuesve apo tifozëve të Atletikos së Madridit, që fitoi 2-3 në fushën e Valadolidit. Ditë të vështira për trajnerin argjentinas, që e ka infermierinë plot me lojtarë të dëmtuar dhe që po përballet me kritika të ashpra nga ana tjetër e Madridit, ku Luka Modriç dhe ish-portieri i tij, Tibo Kurtua, e kanë sulmuar.
Atletiko mundi Valadolidit me shumë vështirësi, me dy gola të Grizman dhe një të Kaliniç. Por, duke qenë se argjentinasi ka një llogari të hapur me fatin e keq, ka ardhur edhe dëmtimi i Filipe Luis, që e lë skuadrën e Simeones me 14 lojtarë në total, në fushë dhe në stol. Megjithatë, tek Atletiko janë mësuar të jenë pak, por të mirë. Pas vuajtjeve në fushë, mbrëmja e së shtunës shkoi keq për Simeonen, i cili është sulmuar nga dy titullarë të Realit.
Sipas spanjolles “Marca”, pas fitores të Real Madridit ndaj Rajo Valekanos, portieri Kurtua ka folur për ish-trajnerin e tij, Simeonen, i cili e ka lançuar në futbollin e madh me fanellën e Atletikos dhe të dy njihen mirë. “Simeone kritikon Real Madridin për t’u bërë më popullor përpara tifozëve të tij. E bën gjithmonë, e sulmon Realin, sepse është skuadra më e mirë në botë”, - ka thënë Kurtua, duke iu referuar deklaratës së Simeones për të: “Kurtua shkoi te Reali dhe u shpall portieri më i mirë në botë”. Më tej, portieri belg ka vazhduar: “Kur luajta në Botëror, isha pjesë e Çelsit dhe votat për çmimin që mora janë dhënë në korrik. Në atë kohë nuk isha ende te Reali. Mendoj se nuk është e drejtë që kërkon të minimizojë suksesin tim. Por e bën gjithmonë. Kam qenë tre vjet në skuadër me të dhe e di që thotë gjëra të tilla për të rritur popullaritetin e tij te tifozët.”
Pak a shumë të njëjtat fjalë ka thënë edhe Luka Modriç. Edhe ndaj kroatit Simeone ka folur me tone kritike, duke thënë se e ka fituar ai “Topin e artë”, ngaqë është lojtar i Realit, dhe jo Grizman, që e ka merituar, sipas argjentinasit. “E respektoj Simeonen, por nuk është e drejtë që sukseset tona të shërbejnë për t’u dhënë zë tezave të tij populiste kundër Realit”. Të gjithë kundër “Cholo”-s, por ndoshta këto sulme nuk janë një ide e mirë, sepse dihet që kur Simeone është me shpatulla pas murit, bëhet edhe më i rrezikshëm.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
