Gazeta Si – Berat Gjimshiti ka rifituar pozitat e tij tek Atalanta. Ai luajti titullar në fitoren 2-0 ndaj Sampdorias, që e ngjit skuadrën bergamaske në vend të katërt, në zonën Champions, me pikë të barabarta me Milanin.
Mbrojtësi kuqezi kishte qëndruar në stol në disa nga ndeshjet e fundit. Ai u kthye titullar në Kupën e Italisë fillimisht dhe tani edhe në kampionat. Ky është një lajm i mirë për trajnerin Silvinjo, sepse Gjimshiti është shumë i rëndësishëm për Kombëtaren. Mbrojtësi shtatlartë u vlerësua me notën 6 për paraqitjen në ndeshjen e sotme.
Kristjan Asllani pritej të ishte titullar sort ndaj Kremonezes në transfertë, por trajneri Inzagi ka thyer parashikimet edhe këtë herë. Ai ka aktivizuar Galiardinin titullar dhe vetëm në 20 minutat e fundit hodhi në fushë mesfushorin shqiptar. Për këtë zgjedhje trajneri i Interit është kritikuar edhe nga specialistët në Itali.
Interi fitoi 1-2 në fushën e Kremonezes, falë dopietës së sulmuesit argjentinas, Lautaro Martinez. Me këtë fitore zikaltrit marrin vendin e dytë, me një ndeshje më shumë se Milani, Lacio dhe Roma.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.