Fusha e mbetjeve urbane është përfshirë nga flakët këtë të hënë në Vlorë, duke shkaktuar një alarm mjedisor. Fusha është kthyer në një rrezik serioz për banorët e zonës, pasi aty grumbullohen të gjitha mbetjet urbane të qytetit. Zjarri ka nisur që prej orës 7:30 të mëngjesit të sotëm, ndërkohë që dyshohet se është i qëllimshëm.
Sipas informacioneve paraprake, në zonë është parë vetëm një makinë zjarrfikëse, e cila ka nisur punën për shuarjen e flakëve.
Megjithatë situata është e rënduar për shkak të çlirimit të gazrave kancerogjenë në ajër nga djegia e plastikeve dhe mbetjet e tjera urbane.
Ky zjarr në fushën e mbetjeve në Vlorës, duket se është i njëjti skenar si ai i rasteve në Fier, Patos dhe Lushnjë, ku zjarret shkaktuan vërtet një situatë të rëndë.
Në Fier flakët zgjatën me ditë të tëra dhe e mbushën qytetin me një re të zezë tymi. Ndërkohë që shuarjes përfundimtare të zjarrit, mbetjet filluan të transportoheshin në incinerator.
Kreu i Bashkisë së Vlorës, Dritan Leli, e konsideron ngjarjen një incident, edhe pse pohoi se informacionet janë për një zjarrvënie të qëllimshme.
“Prej 20 vitesh këtu digjeshin plehrat dhe nuk kujtohej askush, ndërsa sot e konsideroj një incident, policia është duke gjetur shkaktarët. Thuhet se është zjarrvënie e qëllimshme, por le ta gjejnë organet e Policisë së Shtetit”.
Leli tha se zgjidhja përfundimtare për menaxhimin e mbetjeve në Vlorë është landfilli i Sherishtës.
“Landfilli i Sherishtës do të zgjidhë përfundimisht çështjen kaq të nxehtë të trajtimit të mbetjeve në Vlorë dhe jo vetëm. Është duke u ndërtuar. Vlora ka zgjidhje komplet të ndryshme, që është garanci e bashkëpunimit mes qeverisë shqiptare dhe asaj gjermane që do të jetë një histori suksesi në menaxhimin e integruar të mbetjeve në Bashkinë e Vlorës dhe Selenicës”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.