Gazeta Si - Flamurtari është një nga dramat e shumta sportive të viteve të fundit në Shqipëri. Një nga shkollat më të mira të futbollit shqiptar preku fundin sezonin që shkoi, kur ra në Kategorinë e Dytë, që është niveli më i ulët. Një njollë e zezë kjo në historinë e këtij klubi të madh, por për fat të mirë tani, pa u mbushur një vit, vlonjatët kanë ngjitur menjëherë një shkallë.
Me fitoren e fundit ndaj Luftëtarit, një tjetër dramë sportive e futbollit tonë, Flamurtari siguroi zyrtarisht ngjitjen në Kategorinë e Parë, që mbetet gjithsesi nivel inferior, por që i jep mundësinë kësaj skuadre të luftojë për rikthimin në Superiore sezonin e ardhshëm.
Rikthimi i shpejtë nga “ferri’ u bë i mundur, pasi klubi vlonjat kishte një grup futbollistësh me shumë përvojë, që për Kategorinë e Dytë janë luks. Emra të njohur edhe në Superiore, si Ditmar Bicaj, Shpëtim Moçka, Andi Ribaj, Behar Ramadani, Alket Çelhaka dhe të tjerë, luajtën për Flamurtarin në Kategorinë e Dytë, në respekt të fanellës së tij.
Sigurisht, në Vlorë nuk është koha për festë, por për një organizim sa më të mirë për sezonin e ri, në mënyrë që të mos diskutohet rikthimi në elitë, ku Flamurtari ka vendin e tij.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.