Gazeta Si - Ndeshja maratonë e “Loro Boriçit”, që zgjati më shumë se 120 minuta, është mbyllur me kualifikimin e Vllaznisë për në finale të Kupës së Shqipërisë. Partizani është eliminuar me penallti në gjysmëfinale dhe tani rrezikon të mbetet jashtë kupave të Europës, pasi edhe në kampionat nuk është në një pozicion komod.
Pas dy barazimesh në dy ndeshjet gjysmëfinale, 0-0 në të parën dhe 1-1 sot në Shkodër, gjithçka u vendos nga pika e bardhë e penalltisë, ku i vetmi që gaboi në 10 penallti ishte sulmuesi i të kuqve, Xhuljano Skuka. Gjuajtja e tij u prit nga portieri Zogoviç.
Koha e rregullt u mbyll me rezultatin 1-1, me gola të Malës pas vetëm 3 minutash, dhe më pas të Aralicës që barazoi shifrat. Në pjesën e dytë skuadrat u treguan shumë të kujdesshme dhe pak rrezikuan, në fund shkodranët pretenduan edhe për një penallti, por gjyqtari vazhdoi lojën.
As 30 minutat shtesë nuk ndryshuan gjë dhe kualifikimi i mbeti ‘ruletës’ së penalltive, ku fati u buzëqeshi shgkodranëve. Ata realizuan me Gurishtën, Hoxhajn, Adilin, Gjurgjeviç dhe Latifin. Tani kanë shansin ta mbrojnë trofeun e fituar një vit më parë në finale me Laçin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.