Një familje nga Shqipëria rrezikon të deportohet nga Franca për shkak se nuk i është aprovuar kërkesa për azil.
Ata kanë tre vjet në në Francë, por mundësitë e tyre për të qëndruar atje janë të pakta. Televizioni “France 3” i kushtoi një kronikë të zgjeruar dy fëmijëve shqiptarë, motër e vëlla që premtojnë të ardhme të suksesshme në sportin e xhudos.
Xhensila Gjoka 15-vjeçe dhe vëllai i saj më i vogël Nikoll, 11-vjeç, janë nxënës të shkëlqyer. Por motër dhe vëlla përveçse janë nxënës shembullorë, merren edhe me sportin e xhudos në Francë. Sipas trajnerit të tyre ata mund të jenë kampionët e ardhshëm.
Nikoll tashmë është kampion rajonal, i zgjedhur për kampionatin francez që do të mbahet në qershor. Dhe Xhensila do të marrë pjesë në kampionatit francez të xhudos.
Por familja Gjoka, së bashku me fëmijët e tyre mund të largohen, pasi autoritetet lokale kanë paraqitur një urdhër dëbimi që nga dhjetori i viti 2018 ndaj familjes shqiptare.
Ata e apeluan vendimin e Prefekturës në Gjykatën Administrative Të Grenobles dhe seanca e radhës pritet të zhvillohet këto ditë.
Klubi sportv i xhudos Saint-Martin-d’Hères i ka dalë në mbrojtje dy kampionëve, ku përmes një letre, shkruan: “Mirësia dhe mirësjellja e këtyre dy fëmijëve është në përputhshmëri me rregullat e klubit. Ndonëse me origjinë të huaj, ata flasin frëngjisht rrjedhshëm dhe e nuk kanë problem të integrohen”.
Gjatë kronikës së televizionit francez flet edhe babi i fëmijëve, Gjergj Gjoka, i cili thotë se fëmijët e tij janë integruar dhe rritur me një edukatë të mirë sportive.
Mesazhe inkurajuese për fëmijët vijnë edhe nga trajneri i xhudos, i cili vlerëson Nikollën për vlerat si sportist.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
