.png)
Gazeta Si - Shqipëria në futboll për femra ka marrë fitoren e parë në kualifikueset e Europianit 2025, pasi mundi 2-0 Estoninë në “Air Albania”. Golat për Kombëtaren tonë u shënuan nga Fortesa Berisha në minutën e 31-të dhe Kristina Maksuti në kohën shtesë.
Trajneri Armir Grima aktivizoi nga minuta e parë këtë formacion: Viona Rexhepi, Luçije Gjini, Arbenita Curraj, Sara Maliqi, Armera Tukaj, Alma Hilaj, Ezmiralda Franja, Megi Doçi, Fortesa Berisha, Qëndresa Krasniqi dhe Kristina Maksuti.
Shqipëria e dominoi takimin. Vajzat kuqezi patën disa raste të mira shënimi dhe zhbllokuan rezultatin me Fortesa Berishën, por goli u anulua për pozicion të parregullt. Pak minuta më vonë Shqipëria gjeti rrugën e rrjetës po me këtë lojtare dhe goli ishte i rregullt.
Në pjesën e dytë vajzat kuqezi u hodhën në sulm për golin e dytë. Shqipëria pati një mundësi të artë për të dyfishuar rezultatin në minutën e 77-të me Fortesa Berishën, por goditja e saj përfundoi jashtë. Në fund Fortesa Berisha asistoi për Kristina Maksutin, që vulosi fitoren 2-0.
Ishte takimi i dytë kualifikues i Shqipërisë së vajzave, që renditet në vendin e dytë, me 3 pikë, po aq sa Luksemburgu i vendit të parë. Më 31 maj Shqipëria do të luajë takimin e radhës kualifikues në transfertë ndaj Estonisë. Ndeshja e fundit kualifikuese zhvillohet më datë 4 qershor, në stadiumin “Air Albania”, ku Shqipëria do të përballet me Luksemburgun.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
