Dje Shqipëria u përfshi nga stuhi të forta, të cilat u shoqëruan me rënie pemësh, rënie objektesh të ndryshme, etj.
Nga stuhia pesë qytetarë kanë pësuar lëndime të ndryshme dhe kanë përfunduar në Spitalin e Traumës për të marrë mjekim.
Era e fortë në Tiranë arriti shpejtësinë deri në 77 km në orë, duke shkaktuar rënien e depozitës nga një pallat në Komunën e Parisit e po ashtu edhe pemë e tabela të rrëzuara.
Edhe pema e Vitit të Ri në sheshin “Skënderbej” u rrëzua nga era e fortë, por fatmirësisht nuk pati të lënduar.
Ndërkohë natën e kaluar deti i trazuar dhe era e fortë në brigjet e Italisë jugore kanë penguar nisjen e dy trageteve të linjës Bari – Durrës.
Nga të dhënat e Qendrës së Informacionit në Autoritetin Portual Durrës, mësohet se dy tragete janë nisur nga Durrësi drejt Barit sot rreth orës 00.40.
Dy tragetet e tjerë që pritej të mbërrinin rreth orës 21.00 të së dielës nuk u nisën dot nga Bari për arsye të motit të keq .
Ndërkohë, kompanitë e lundrimit njoftojnë se kanë marrë masa për njoftimin e udhëtarëve për ndryshimet e orareve të nisjes së trageteve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.