Emigrantët sollën 1% më shumë para gjatë pandemisë

Në tre muajt e parë të 2020-s emigrantët që punojnë dhe jetojnë jashtë vendit sollën në Shqipëri 152 milionë euro, sipas statistikave të Bankës së Shqipërisë. Në raport me të njëjtën periudhë të një viti më parë ka një rritje të lehtë prej 1%.

Prej të paktën 5 vitesh, tendenca e remitancave i ishte rikthyer rritjes, e lidhur kjo me rigjallërimin e ciklit të emigracionit në Shqipëri, ku të ikurit rishtazi kanë lidhje të forta me vendin mëmë dhe pasi stabilizohen me punë, kanë tendencën t'u dërgojnë para të afërmeve të tyre. Në të kundërt pas vitit 2008 prurjet e emigrantëve kishin shënuar rënie ciklike për disa vite (deri në 2016-n), pasi emigrantët e larguar në mes të viteve ’90 kishin filluar të ndërprisnin lidhjet me shtetin e origjinës.

Por, tendenca rritëse pritet të ndikohet nga pasojat që Covid-19 ka shkaktuar në ekonominë globale, sidomos në shtetet fqinjë.

Elton Çollaku, CEO i Unionit Financiar Tiranë, agjent i transferimit të parave të Western Union, për Shqipërinë, Maqedoninë dhe Kosovën, tha se muajt e parë të vitit kishin nisur me një tendencë mjaft pozitive. Por, në 10 ditëshin e fundit të muajit mars, krijimi i një situate kaotike dhe paniku në vendet fqinje dhe mbyllja e menjëhershme e vendeve të punës, sidomos në Itali dha efekt të menjëhershëm në paratë që dërgoheshin në Shqipëri. Kjo tendencë ishte më e dukshme kryesisht nga Italia dhe Greqia, që janë dhe dy shtetet kryesore nga vijnë remitancat në Shqipëri.

Situata ishte e ngjashme dhe në muajin në vijim, por gradualisht nga fundi i prillit me rikthimin e lehtësive me vendet e Perëndimit filloi normalizimi i remitancave, ndërsa maji është rikthyer në vlera pozitive.

Çollaku thotë se sjellja e remitancave reflekton se si kanë qenë masat në vendet e Perëndimit. Në shtetet që kanë pasur masa më të lehta nuk ka ndryshuar shumë tendenca, psh në Gjermani, Zvicër, apo vendet skandinave.

Shtetet që janë prekur më fort dhe ku masat kanë qenë më të ashpra kanë pasur efekt më të madh në remitanca, ky kryesorja është Italia, por më pas edhe Anglia, e cila u mbyll pak më vonë.

Ai shton se me lehtësimin e masave gjërat i janë kthyer normalitetit dhe remitancat nga kanalet zyrtare kanë tendencë të rikuperojë, pasi janë rihapur ekonomitë dhe njerëzit i janë rikthyer vendeve të tyre të punës.

Një arsye kryesore, sipas tij lidhet edhe me faktin që mbyllja në Shqipëri, që kulmoi në prill, ka krijuar një situatë të vështirë tek familjet, të cilat po u kërkojnë ndihmë të afërmve të tyre jashtë. Kjo tendencë ka qenë më e dukshme në muajin maj dhe në qershor.

Burimi: Monitor.al

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.