E kanë qëlluar disa herë me pistoletë, teksa ndodhej në makinën e tij, afër shtëpisë, në periferi të Johanesburgut. Ka ndërruar jetë Mark Batchelor, ish-sulmuesi i kombëtares së Afrikës së Jugut, lojtar i Kaizer Chiefs dhe udhëheqësi i Orlando Pirates në fitimin e Champions League të Afrikës në vitin 1995.
Policia ka hapur menjëherë një hetim për vrasje dhe është në kërkim të dy personave që hapën zjarr nga një motoçikletë mbrëmjen e së hënës. Të paktën 7 plumba kanë shpuar xhamin e BMV-së së ish-futbollistit dhe i kanë marrë jetën atij. Zëdhënësi i policisë, Lungelo Dlamini, ka bërë të ditur se Batchelor është vrarë me armë zjarri dhe se ende janë të panjohura shkaqet e kësaj ngjarjeje. Nuk është vjedhur asgjë nga makina e ish-lojtarit dhe nuk është bërë i mundur ende identifikimi i të dyshuarve.
Batchelor ka qenë vite më parë në qendër të kronikave në Afrikën e Jugut, pasi atleti paraolimpik Oskar Pistorius e kishte kërcënuar se do t’i thyente këmbët, pas disa deklaratave të ish-futbollistit në lidhje me raportin e shumë diskutuar të kampionit paraolimpik me femrat. Në atë kohë Pistorius ishte i ndaluar, pasi akuzohej për vrasjen e të dashurës së tij.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.