Gazeta Si - SPAK ka dërguar për gjykim Alban Bengasin, i arrestuar si pjesë e dosjes “Plumbi i Artë”, pasi akuzohet se ka porositur Nuredin Dumanin dhe Elio Bitrin për të dhunuar ish-bashkëshorten.
Sipas Prokurorisë së Posaçme, Bengasi, ish bashkëshorti i të dëmtuarës Blerta Ruçi, për shkak të konflikteve familjare, ka qënë porositësi i aktit të dhunës.
Madje ai do të jepte shumën 120 mijë eurove duke kërkuar deri në eliminimin fizik të ish-bashkëshortes.
Festim Qoli, është personi që ia ka ofruar si “punë”, të pandehurit Nuredin Dumani dhe më pas ka mundësuar takimin ndërmjet të pandehurve Alban Bengasi dhe Nuredin Dumani.
"Ndërsa i pandehuri Nuredin Dumani, është personi që ka kryer ndjekjen e shtetases Blerta Bengasi, për të mësuar lëvizjet dhe përditshmërinë e saj, dhe i bashkëhetuari Eljo Bitri është ekzekutori, personi i cili ka goditur shtetasen Blerta Bengasi, ditën e ngjarjes”, - thotë SPAK.
Nga hetimet është evidentuar përfshirja në krim edhe e një personi tjetër, shok i të bashkëhetuarit Eljo Bitri, i paidentifikuar deri më tani, i cili shfaqet në rolin e ndihmësit pasi ka qenë drejtuesi i mjetit me të cilin është larguar i bashkëhetuari Eljo Bitri nga vendi i ngjarjes.
Këta shtetas kanë bashkëvepruar në bashkëpunim në formën e grupit të strukturuar kriminal, duke e shtrirë në kohë dhe vende aktivitetin e ndjekjes së të dëmtuarës nga vepra penale, si dhe duke patur një ndarje të qartë rolesh në kryerjen e veprës penale.
Alban Bengasi akuzohet për veprat penale “Dhuna në familje”, kryer në formën e grupit të strukturuar kriminal dhe kryerjen e veprave penale nga grupi i strukturuar kriminal dhe organizata kriminale”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.