Dy të pestat e të rriturve kanë dhimbje kronike nga mesi i të 40-tave

Më shumë se dy të pestat e njerëzve në Britani vuajnë nga një formë dhimbjeje kronike në kohën kur janë në mesin e të 40-tave.

Dhimbja kronike ose e vazhdueshme është dhimbje që zgjat më shumë se tre muaj pavarësisht mjekimit ose trajtimit.

Mund të prekë të gjitha moshat dhe të gjitha pjesët e trupit si dhimbje shpine, koke ose dhimbje të muskujve.

Tani, shkencëtarët kanë zbuluar se njerëzit që vuajnë nga dhimbje të vazhdueshme në të 40-at kanë më shumë gjasa të jenë të pakënaqur, të zhvillojnë depresion dhe të mbeten të papunë.

Gjetjet e tyre sugjerojnë gjithashtu se dhimbja kronike në moshën 44-vjeçare është e lidhur me dhimbje shumë të forta në moshën 51-vjeçare dhe se të sëmurët do të jenë më të prekshëm ndaj viruseve si Covid.

Hulumtimi, i publikuar në revistën Plos One, bazohet në më shumë se 12,000 njerëz të lindur në një javë të vetme në mars 1958, të cilët u ndoqën deri në moshën 62-vjeçare.

Bashkautori i studimit, Profesor Alex Bryson, i Institutit të Kërkimeve Sociale të Kolegjit Universitar të Londrës, tha se dhimbja kronike është një problem shumë serioz që prek një numër të madh njerëzish.

“Duke ndjekur një grup lindjeje gjatë gjithë jetës së tyre, ne zbuluam se dhimbja kronike është e vazhdueshme dhe është e lidhur me rezultate të dobëta të shëndetit mendor më vonë në jetë, duke përfshirë depresionin, si dhe që çon në shëndet më të dobët të përgjithshëm dhe papunësi. Shpresojmë që hulumtimi ynë të hedhë dritë mbi këtë çështje dhe ndikimet e saj të gjera, dhe që të merret më seriozisht nga politikëbërësit", tha Bryson.

Studimi zbuloi se 41 për qind e njerëzve raportuan se vuanin dhimbje kronike në kohën kur arritën në mesin e të 40-tave.

Rezultatet treguan gjithashtu se ata që vuanin me dhimbje kronike në moshën 44 vjeçare kishin më shumë gjasa të ishin të pakënaqur deri në moshën 50 vjeçare dhe të përjetonin depresion në moshën 55 vjeçare.

Sondazhi tregoi se dhimbja kronike lidhet me një probabilitet më të lartë të infektimit me Covid 20 vjet më vonë, në 2021.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.