.png)
Gazeta Si - Pas rreth dy muajsh nga dhuna ndaj kushërinjve Maja, Prokuroria e Tiranës ka ndryshuar akuzën për anëtarët e fisit Rraja.
Ndryshe nga nisja e hetimit për “plagosje të rëndë me dashje, në bashkëpunim”, pas publikimit të dhunës me shkopa bejsbolli, prokuroria ka vlerësuar që hetimi duhet të vijojë për akuzën e “plagosjes së lehtë me dashje”.
Ndryshimi i kualifikimit ka ardhur pas administrimit të akt-ekspertimeve mjeko-ligjore ndaj të dëmtuarve.
Personat nën hetim për ngjarjen e rëndë të ndodhur në fillim të muajit Korrik, janë Ineidi Rraja, Andi Rraja, Eni Kullaj, Përparim Rraja, Xhelal Rraja, Flamur Rraja, Rexhep Rraja, Klajdi Rraja dhe Edison Meta.
Disa nga këta persona janë arrestuar dhe aktualisht janë lënë në masën e “arrestit në burg”. Ndërsa Rexhep Rraja, djali Rahmanit, deputetit të PS në Fushë Krujë dhe Xhelal Rraja vijojnë të jenë në kërkim policor.
LEXO EDHE:
- Dhuna nga fisi ‘Rraja’, ‘shkrihet’ komisariati i Policisë së Krujës, Tonin Vocaj merr kompetencat
- Dhuna për guroren, jep dorëheqjen deputeti i PS-së, Rrahman Rraja: Largohem nga jeta politike (vendimi pas publikimit të videos)
Përveç lehtësimit të pozitës penale, akuza e re kërkon ankim nga të dëmtuarit për vijimin e hetimit.
Çka do të thotë që, nëse Bilbil e Jashar Maja nuk kërkojnë hetimin e dhunuesve të tyre, çështja penale ndaj Rrajave mund të pushohet.
Dy kushërinjtë Maja u dhunuan brutalisht në një lokal nga një grup personash për shkak se u ankuan se gurorja në pronësi të kushëririt të deputetit Rrahman Rraja po u dëmtonte banesat.
Mes dhunuesve u identifikuan Rexhep Rraja, djali i deputetit Rrahman Rraja dhe dy vëllezërit e tij.
Shkak ishte bërë një gurore në fshatin Borizanë, në pronësi të Përparim Rrajës, kushëriri i ish deputetit socialist të Krujës, i cili ka leje shfrytëzimi dhe licencë për këtë aktivitet.
Mesditën e së enjtes (6 korrik 2023) ata ishin në lokal me inxhinierin e gurores për t’i kërkuar që shpërthimet të ishin më të kontrolluara, pasi po u dëmtoheshin banesat.
Në këto momente grupi i dhunuesve mësyu lokalin dhe ata pësuan një dhunë barbare me grushte, shkelma dhe shkopa bejzbolli.
Pas ngjarjes së rëndë, Rrahman Rraja dorëzoi mandatin e deputetit, pasi i përfshirë në episodin e dhunshëm ishte i biri Rexhep Rraja dhe familjarë të tjerë të tij.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
