Gazeta Si - Tomas Strakosha do të transferohet në Premier Ligë sezonin e ardhshëm. Janë për t’u pëcaktuar edhe detajet e fundit, por portieri kuqezi duket se ka arritur akordin me Fulhemin. Zyrtarizimi është çështje orësh.
Pas 6 sezonesh, Strakosha do të largohet nga Lacio. Portieri shqiptar është në fund të kontratës me klubin italian dhe për të ardhmen ka zgjedhur kampionatin anglez.
Fulhemi, i rikthyer në nivelin më të lartë të futbollit anglez, është në detajet e fundit të mbylljes së marrëveshjes. Klubi nga Londra ka marrë “ok”-in e Strakoshës për një kontratë 4-vjeçare.
Strakosha bëhet kështu lojtari i tretë kuqezi që luan në Premier Ligë, pas Lorik Canës dhe Armando Brojës.
Me Lacion Strakosha numëron 207 ndeshje me skuadrën e parë. Ai ka fituar 2 Kupa Italie dhe 2 Superkupa Italie. Me të rinjtë e Lacios ka fituar një titull kampion dhe një Kupë.
Gjatë këtij sezoni palët nuk arritën të gjenin gjuhën e përbashkët për rinovimin e kontratës. Lacio në këtë mënyrë nuk përfiton asgjë nga portieri kuqezi. Strakosha është aktivizuar titullar nga trajneri Mauricio Sarri vetëm në gjysmën e dytë të sezonit.
Portieri 27-vjeçar duket se e kishte vendosur për t’u transferuar në Angli, në kampionatin më të fortë në botë. Përveç Fulhemit, për të është interesuar edhe klubi i Njukasëllit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.